„პრემიერი გაექცათ, თალაკვაძე მოხსნეს, შენ სად მირბიხარ, დროზე ადრე ხელს რომ აწერ?", - აცხადებს პარტია „კანონი და სამართალის" ლიდერი თაკო ჩარკვიანი ოპოზიციის ნაწილის პარლამენტში შესვლის გადაწყვეტილებთან დაკავშირებით.
მისივე თქმით, თანმიმდევრული პროტესტით ოპოზიციას მეტის მიღება შეეძლო.
„ყველაფერი ისე მიდიოდა... ყველაფერს არც ახლა ვიტყვი, მგონი ახლაც არ არის დრო, მაგრამ ისე მიგვყავდა ჩვენ, ოპოზიციას, ძალიან ჭკვიანურად, გონივრულად, არავინ არ იყო ჩაციკლული რაღაცებზე მინდა გითხრათ. თანმიმდევრულად მიდიოდა ყველაფერი, ბოიკოტმა თავისი შედეგი გამოიღო... ეს ყველაფერი გააკეთა ბოიკოტმა. შემდეგ უკვე ეს ყველაფერი მოიტანა ნიკა მელიას იმხელა პროტესტმა. იშლება (ქართული ოცნება), პრემიერი გაექცათ, თალაკვაძე მოხსნეს, გაუშვეს, შენ სად მირბიხარ დროზე ადრე ხელს რომ აწერ? ჩვენ, ჩვენი თანმიმდევრულობით ბევრად უფრო საინტერესოს და მეტის წამოღება შეგვეძლო", - აცხადებს ჩარკვიანი.
შეგახსენებთ, 6-თვიანი ბოიკოტის შემდეგ ოპოზიცია დღეს პირველად დაესწრო პარლამენტის სხდომას. პარლამენტში შევიდა კოალიცია „სტრატეგია აღმაშენებლელი", რომლის სიით მეორე ნომერი თაკო ჩარკვიანია, თუმცა ის პროტესტის ნიშნად პარლამენტში არ შევიდა და კოალიციაც დატოვა.
