არ ვიცი, უკრაინის დაზვერვა როგორ მუშაობს, მაგრამ როცა იმ მეგობრის წინააღმდეგ წააყენებ მძიმე ბრალდებას, რომელიც გვერდში გიდგას პოლიტიკურად, ჰუმანიტარულად და ასევე იმ მეგობრის მიმართ, რომელსაც სამი ომი აქვს გამოვლილი და რუსეთთან გარიგებას დააბრალებ, მინიმუმ რაღაც მტკიცებულება უნდა წარადგინო, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.
შალვა პაპუაშვილი გამოეხმაურა უკრაინული მედიის მიერ ქვეყნის დაზვერვაზე დაყრდნობით გავრცელებულ ინფორმაციას, რომ „რუსეთი საქართველოსთან, სომხეთთან და აზერბაიჯანთან მოლაპარაკებებს აწარმოებს რუსული პროდუქციის მესამე ქვეყნებში რეექსპორტისთვის“.
როგორც შალვა პაპუაშვილმა აღნიშნა, არასერიოზულმა ბრალდებებმა ასეთ განცხადებებს ფასი დაუკარგა.
„ვხედავთ, რომ ასეთი განცხადებების ჯერადობამაც იმატა და ამას რაიმე შედეგი არ აქვს, რომ საზოგადოებაში სერიოზულად მოხდეს მსჯელობა. ხედავთ, რომ ნაწილობრივ, ოპოზიციაც კი ასეთ განცხადებებს არასერიოზულად აღიქვამს, როცა ხდება ბრალდებების წამოსროლა საქართველოს მიმართ ისე, რომ არანაირი მტკიცებულება არ არის. ფაქტია, რომ ასეთ მოვლენასთან გვაქვს საქმე. არ ვიცი, უკრაინის დაზვერვა როგორ მუშაობს, მაგრამ როცა იმ მეგობრის წინააღმდეგ წააყენებ მძიმე ბრალდებას, რომელიც გვერდში გიდგას პოლიტიკურად, ჰუმანიტარულად და ასევე იმ მეგობრის მიმართ, რომელსაც სამი ომი აქვს გამოვლილი და რუსეთთან გარიგებას დააბრალებ, სულ მცირე რაღაც მტკიცებულება უნდა წარადგინო. ასეთი მტკიცებულება წარდგენილი არ არის ისევე, როგორც წინა შემთხვევაში. ყველა დავრწმუნდით, რომ ეს ბრალდება არის ტყუილი. კონკრეტულად არაფერი ითქვა და უბრალოდ ბრალდება იყო. სამწუხაროა, რომ სხვადასხვა ინსტიტუციები სხვადასხვაგვარად მოქმედებენ. საბოლოო ჯამში ამ ინსტიტუტების განცხადებებს ფასი ეკარგება. არადა, როცა ომია, მნიშვნელოვანია, ამ ინსტიტუტებმა სერიოზულობა არ დაკარგოს“, – განაცხადა პაპუაშვილმა.
