„პრემიერ-მინისტრის დავალებით გადავწყვიტეთ, რომ ტურისტული ინდუსტრია იქნება პრიორიტეტული ჯგუფი ვაქცინაციის კონტექსტში. ჩვენთვის მნიშვნელოვანია, რომ ძალიან სწრაფად მოვახდინოთ ტურისტული ინდუსტრიის აღდგენა, მისი მარკეტინგული მხარდაჭერა საერთაშორისო პლატფორმაზე, სრულად მსოფლიომ , რომ შეიტყოს ჩვენი ტურისტული ინდუსტრია არის კოვიდ უსაფრთხო",- განაცხადა ეკონომიკის მინისტრმა, ნათია თურნავამ საკოორდინაციო საბჭოს დასრულების შემდეგ გამართულ ბრიფინგზე.
მისივე თქმით ტურიზმის ინდუსტრიაში მოქმედ იმ კომპანიებს, რომელთა თანამშრომელთა უმრავლესობა აცრილი იქნება, კოვიდ-უსაფრთხო სტატუსი მიენიჭებათ. მსოფლიო მასშტაბით კი მათი პოპულარიზაციისთვის მარკეტინგულ ხარჯებს სახელმწიფო გაიღებს.
"ის ორგანიზაციები, სადაც დასაქმებული პერსონალის უდიდესი უმრავლესობა, წესების დაცვით აიცრება, ჩაითვლება კოვიდ-უსაფრთხო სასტუმროებად, რესტორნებად, კომპანიებად და ჩვენს ხელთ არსებული ყველა რესურსით მთელ მსოფლიოში მათ პრომოუშენს გავუწევთ. მსოფლიო შეიტყობს, რომ ესა თუ ის სასტუმრო კოვიდ-უსაფრთხოა.
ეს ძალიან დაგვეხმარება ტურიზმის აღდგენაში. ყოველდღიურად გვემატება ფრენები და ახლა მთავარია უსაფრთხო მასპინძლობა. უსაფრთხო მასპინძელი ქვეყნის სტატუს პრაქტიკაში გავატარებთ", - განაცხადა თურნავამ.
