„ჩვენ ჩვენი დოკუმენტებით და კანონპროექტებით ვიაროთ, ეს ჩემთვის ცოტა გაუგებარია", - განაცხადა დღეს, 7 მაისს, „გირჩის" ერთ-ერთმა ლიდერმა, იაგო ხვიჩიამ ოპოზიციის ნაწილის ინიციატივაზე კომენტირებისას.
ცნობისთვის: ოპოზიციამ პარლამენტში შესაძლოა, „ადმინისტრაციულ სამართალდარღვევათა კოდექსში" ცვლილებების ალტერნატიული კანონპროექტი დაარეგისტრიროს.
ხვიჩიას თქმით, ვეტო თუ არ იქნება გამოყენებული, მოგვიწევს გამკაცრებული საბჭოთა კანონის პირობებში ცხოვრება.
„მგონია, რომ ჩვენ უნდა შევძლოთ ერთმანეთთან საუბარი, რომ ერთიან დოკუმენტზე შევთანხმდეთ და არა - ისე, რომ ყველაფერზე, რაც არ მოგვეწონება, ჩვენ ჩვენი დოკუმენტებით და კანონპროექტებით ვიაროთ, ეს ჩემთვის ცოტა გაუგებარია. ვეტო თუ არ იქნება, მოგვიწევს კიდევ უფრო მეტად გამკაცრებული საბჭოთა კანონის პირობებში ცხოვრება,"- განაცხადა ხვიჩიამ.
ცნობისთვის: 29 აპრილს, პარლამენტმა ადმინისტრაციულ სამართალდარღვევათა კოდექსში ცვლილებების შეტანას მხარი დაუჭირა. ცვლილებების მიხედვით, წვრილმანი ხულიგნობის ჩადენისთვის ადმინისტრაციულ სახდელდადებული პირის მიერ ამავე ადმინისტრაციული სამართალდარღვევის განმეორებით ჩადენა გამოიწვევს სამართალდამრღვევის დაჯარიმებას 1500 ლარიდან 2000 ლარამდე ოდენობით ან ადმინისტრაციულ პატიმრობას 5-დღიდან 15 დღემდე ვადით.
სამსახურეობრივი მოვალეობის შესრულების დროს სამართალდამცავთა მოთხოვნისადი დაუმორჩილებლობა ან/და შეურაცხყოფა გამოიწვევს სამართალდამრღვევის დაჯარიმებას 2000 ლარიდან 3000 ლარამდე ოდენობით ან ადმინისტრაციულ პატიმრობას 15 დღემდე ვადით. ხოლო ამავე ქმედების განმეორებით ჩადენა - სამართალდამრღვევის დაჯარიმებას 3500 ლარიდან 4500 ლარამდე ოდენობით ან ადმინისტრაციულ პატიმრობას 7-დღიდან 15 დღემდე ვადით.
შეგახსენებთ: სანქციების გამკაცრების შესახებ კანონპროექტი პარლამენტმა დაჩქარებული წესით განიხილა. კანონს რეპრესიულად აფასებენ არასამათავრობო ორგანიზაციები და ოპოზიციის ნაწილი. ცვლილებების მიღება გააკრიტიკა ამერიკის საელჩომაც.
