ვიქტორ მედვედჩუკმა პეტრო პოროშენკოს წინააღმდეგ „ნახშირის„ და „მილსადენის“ საქმეებში ჩვენება მისცა. უკრაინული მედიის ცნობით, სახელმწიფო ღალატსა და ტერორიზმის დახმარებაში ეჭვმიტანილმა, ვლადიმერ პუტინის ნათლიამ, ვიქტორ მედვედჩუკმა სამარა-დასავლეთის მიმართულებით ნავთობპროდუქტების მილსადენის ნაწილის სახელმწიფო საკუთრებიდან გამოყვანის სქემაზე ისაუბრა, რაც მასში დიზელის საწვავის შემდგომ გადატუმბვას ითვალისწინებდა.
გარდა ამისა, მან ჩვენება მისცა ე.წ. ქვანახშირის საქმეზე, რომელშიც მეხუთე პრეზიდენტი პეტრო პოროშენკო ფიგურირებს.
მედვედჩუკის განცხადებით, პოროშენკომ არა მხოლოდ მიმართა მედვედჩუკს რუსეთის ფედერაციის ხელმძღვანელობასთან დაკავშირების თხოვნით, არამედ უზრუნველყო უკრაინის ყველა ინსტანციაში აუცილებელი გადაწყვეტილებების მიღება.
„იმისთვის, რომ ეს მილსადენი კერძო საკუთრება და, ფაქტობრივად, თავად პოროშენკოს საკუთრება გამხდარიყო, საჭირო იყო არაერთი ქმედება. სასამართლოები, პროკურატურა, ანტიმონოპოლიური კომიტეტი, სახელმწიფო ქონების ფონდი – ყველა მათგანმა მიიღო გადაწყვეტილებები, რა თქმა უნდა, ისეთი, რაც აუცილებელი იყო პრეზიდენტ პოროშენკოს პირადი ინტერესებისთვის“, – თქვა მედვედჩუკმა.
დაკავებული დეპუტატი ირწმუნება, რომ მილსადენის საკითხებს უკრაინის ყოფილი პრეზიდენტის, პოროშენკოს მოთხოვნით ეხებოდა.
ექსპლუატაციის ერთი წლის განმავლობაში მილსადენმა მფლობელებისთვის ორჯერ მეტი ფული გამოიმუშავა, ვიდრე მის შესყიდვაში იყო ჩადებული – 42 მილიონ დოლარამდე. 2019 წლის მაისიდან, პოროშენკოს უფლებამოსილების შეწყვეტის შემდეგ, მაგისტრალში დიზელის გადატუმბვა შეწყდა. მედვედჩუკმა ასევე ისაუბრა 2014-2015 წლებში დროებით ოკუპირებულ ტერიტორიებზე უკრაინის ენერგეტიკული სექტორის საჭიროებისთვის ქვანახშირის შესყიდვის მექანიზმის შექმნაზე, პრაქტიკულად სეპარატისტების ლიდერებისგან. მედვედჩუკმა დაკითხვისას დაასახელა უკრაინის ინტერესების შელახვაში მონაწილე ჩინოვნიკების კონკრეტული გვარები – ყოფილი თანამდებობის პირები, ეროვნული ბანკის ყოფილი ხელმძღვანელობა, სახალხო დეპუტატები და სამართალდამცავი უწყებების წარმომადგენლები.
