კუნძულ ზმეინის გათავისუფლება მნიშვნელოვნად ცვლის სიტუაციას შავ ზღვაში, – ეს განცხადება უკრაინის პრეზიდენტმა, ვოლოდიმირ ზელენსკიმ ომის 127-ე დღის ბოლოს გამოქვეყნებულ ვიდეომიმართვაში გააკეთა.
მან მადლობა გადაუხადა ყველა სამხედრო მოსამსახურეს, დაზვერვას და მფრინავებს, რომლებმაც ზმეინის გათავისუფლებაში წვლილი შეიტანეს.
„დღევანდელი დღის სიტყვა ნამდვილად არის კუნძული ზმეინი. ამდენი ამ კუნძულზე მხოლოდ მაშინ ვისაუბრეთ, როდესაც იქ რუსული გემი ჩავიდა. შემდეგ გემიც სამუდამოდ წავიდა და ახლა კუნძულიც თავისუფალია. მინდა, მადლობა ვუთხრა დაზვერვის მთავარ სამმართველოს, ალფას მებრძოლებს, ჩვენს არტილერისტებს, არმიის პილოტებს, „ალექსანდრიას“ მეთაურებს. კუნძული ზმეინი არის სტრატეგიული პუნქტი და მნიშვნელოვნად შეცვლის სიტუაციას შავ ზღვაში. ეს ჯერ არ არის უსაფრთხოების გარანტია. ეს ჯერ კიდევ არ არის გარანტია, რომ მტერი არ დაბრუნდება. მაგრამ ეს მნიშვნელოვნად ზღუდავს ოკუპანტების მოქმედების შესაძლებლობას. ჩვენ თანდათანობით გავაძევებთ მათ ჩვენი ზღვიდან, ჩვენი მიწიდან და ციდან“,- განაცხადა ზელენსკიმ.
ამასთან, ზელენსკიმ განაცხადა, რომ სიტუაცია დონბასში განსაკუთრებით მძიმეა და ყველა, ვინც ქვეყნის აღმოსავლეთში იბრძვის, გმირია.
„დონბასში სიტუაცია ძალიან მძიმეა. მტერი იყენებს მთელ თავის მარაგს, რომ ჩვენ დაგვარტყას – ლუგანსკსა და დონეცკში. მინდა, ყველას მადლობა ვუთხრა, ვინც ასეთ სიტუაციაში იცავს ქვეყანას. ეს ნამდვილი გმირობაა“, – განაცხადა უკრაინის პრეზიდენტმა.
თავის მიმართვაში ზელენსკიმ მადლობა გადაუხადა აშშ-ის სამხედრო დახმარების ახალი 800- მილიონ დოლარიანი პაკეტის გამოყოფისთვის.
უკრაინის პრეზიდენტმა ასევე მიულოცა ჩეხეთს ევროკავშირის თავმჯდომარეობის გადაბარება საფრანგეთისგან და მადლობა გადაუხადა ჩეხეთის მთავრობას, რომ მათ ევროკავშირის თავმჯდომარეობის პერიოდში ერთ-ერთ პრიორიტეტად უკრაინა დაასახელა.
მან ასევე აღნიშნა, რომ უკრაინა აქტიურად იმუშავებს, რათა უახლოეს ხანში დაიწყოს მზადება ევროკავშირში გაწევრიანების შესახებ მოლაპარაკებების დასაწყებად.
