ვფიქრობ, მეტი ინფორმაციაა საჭირო მოსახლეობისთვის, რას უშავებდნენ ეს დამიანები ქვეყანას და რატომ არის მათი სანქცირება საჭირო, – ამის შესახებ „სტრატეგია აღმაშენებლის“ წევრმა, პაატა მანჯგალაძემ ერთ-ერთ უკრაინულ პორტალზე გამოქვეყნებულ სიასთან დაკავშირებით ჟურნალისტებთან საუბრისას განაცხადა.
კერძოდ, უკრაინულ ვებგვერდზე – sanctions.nazk.gov.ua, რომელიც ქვეყნის საგარეო უწყების მხარდაჭერითაა შექმნილი, გამოქვეყნებულია ფიზიკური პირების მონაცემები, რომელთაც, ამავე საიტის თანახმად, ჯერ არ შეხებიათ სანქციები. მათ შორის არიან ლევან ვასაძე, ოთარ ფარცხალაძე, სულხან პაპაშვილი, დავით ხიდაშელი, ვანო ჩხარტიშვილი, ტატე მამაცაშვილი, უჩა მამაცაშვილი, გიორგი კაპანაძე, ირაკლი რუხაძე, ქეთევან ხარაიძე, ალექსანდრე ივანიშვილი, ბიძინა ივანიშვილი.
„ეს სია საკმაოდ მნიშვნელოვანი საკითხია. ვფიქრობ, მეტი ინფორმაციაა საჭირო მოსახლეობისთვის, რას უშავებდნენ ეს ადამიანები ქვეყანას და რატომ არის მათი სანქცირება საჭირო. ეჭვი არ მეპარება, რომ ნამდვილად ასეა, მაგრამ იმისათვის, რომ მოქალაქეებმა გაიგონ, ეს რატომ ხდება, მეტი ინფორმაციაა საჭირო. ვანო ჩხარტიშვილთან დაკავშირებით საზოგადოებაში არის აზრი, რომ ის ოლიგარქია, ბიძინა ივანიშვილთან დაახლოებული პირია, არ წარმოადგენს ხალხის ინტერესს და ემსახურება ოლიგარქიას. ეს კითხვის ნიშნებია მასთან დაკავშირებით“, – განაცხადა პაატა მანჯგალაძემ.
