ის, რომ ვიღაცას უფლება აქვს გაძარცვოს ტელევიზია და ამაზე კანონი არ რეაგირებდეს, არ მგონია, რომ არის ევროპული ან ამერიკული მიდგომა, - ამის შესახებ ჟურნალისტებთან საპარლამენტო უმრავლესობის წევრმა ირაკლი ქადაგიშვილმა ნიკა გვარამიას პატიმრობასთან დაკავშირებით აშშ-ის საელჩოს და ევროკომისიის საგარეო ქმედებათა სამსახურის განცხადებების კომენტირებისას აღნიშნა.
მისი თქმით, სასამართლო ხელისუფლება თვითონ იღებს გადაწყვეტილებას.
„შეშფოთება მესმის, მაგრამ ამავდროულად, გვინდა გვესმოდეს კონკრეტული ფაქტები, რით არის ეს შეშფოთება გამოწვეული. ის, რომ ვიღაცას უფლება აქვს უკანონოდ მიიტაცოს, გაძარცვოს ტელევიზია და ფინანსები გადმოქაჩოს და ამაზე კანონი არ უნდა რეაგირებდეს, არ მგონია, რომ ეს არის ევროპული ან ამერიკული მიდგომა. ზოგადად შემაშფოთებელია, როცა მედიაში ასეთი ამბები ხდება, მაგრამ არსებობს კიდევ ამ ქვეყანაში კანონიც და სასამართლოც,“ - განაცხადა ქადაგიშვილმა.
ინფორმაციისთვის, ევროკომისიის საგარეო ქმედებათა სამსახურის პრეს-სპიკერი „მთავარი არხის“ გენერალური დირექტორის ნიკა გვარამიას საქმეზე თბილისის სააპელაციო სასამართლოს განაჩენთან დაკავშირებით განცხადებას ავრცელებს.როგორც განცხადებაშია აღნიშნული ევროკავშირი ამ საქმეს ყურადღებით აკვირდება.
ამასთან, ევროკომისია მიუთითებს, რომ ევროკომისიის მიერ განსაზღვრულ ერთ-ერთ პრიორიტეტს წარმოადგენს მედიის მფლობელთა წინააღმდეგ მიმართული სისხლის სამართლებრივი პროცედურები აკმაყოფილებდეს უმაღლეს იურიდიულ სტანდარტებს“.
აშშ- ის საელჩოს განცხადების თანახმად კი, „მთავარი არხის“ გენერალური დირექტორის, ნიკა გვარამიას პატიმრობა რისკის ქვეშ აყენებს ქართველი ხალხის მკაფიო არჩევანსა და საქართველოს ლიდერების გაცხადებულ მიზანს უფრო უსაფრთხო, დემოკრატიული, ევროპული მომავლისა.
ამასთან, განცხადებაში აღნიშნულია, რომ შერჩევითი გამოძიების, სისხლისსამართლებრივი დევნისა და მსჯავრდადების აღქმაც კი ასუსტებს საზოგადოების ნდობას სამართალდამცავების, პროკურატურის, სასამართლოებისა და თავად ხელისუფლების მიმართ.
