სასამართლო სხდომაზე ოთხივე მსჯავრდებულმა წარდგენილი ბრალდება აღიარა და საპროცესო შეთანხმების პირობებს დაეთანხმა.
„ვაცნობიერებ სამართლებრივ შედეგებს, ზეწოლას ადგილი არ ჰქონია“, – განაცხადა მურთაზ ზოდელავამ.
საპროცესო შეთანხმების თანახმად, ოთხივე მსჯავრდებულს სასჯელის სახით 3 წლითა და 1 თვით თავისუფლების აღკვეთა განესაზღვრა, საიდანაც 1 წელი და 1 თვე პენიტენციურ დაწესებულებაში უნდა მოიხადონ, ხოლო დარჩენილი 2 წელი პირობით სასჯელად ჩაეთვლებათ.
შეთანხმების შედეგად, მურთაზ ზოდელავა და ლაშა ბერიძე პენიტენციურ დაწესებულებას 4 ნოემბერს დატოვებენ, ირაკლი ჩხვირკია – 6 ნოემბერს, ხოლო გური ჟვანია – 16 ნოემბერს.
შეგახსენებთ, თბილისის საქალაქო სასამართლოს თავდაპირველი განაჩენით, 2025 წლის 4 ოქტომბრის მოვლენების საქმეზე მურთაზ ზოდელავასა და ლაშა ბერიძეს 7-7 წლით თავისუფლების აღკვეთა ჰქონდათ მისჯილი, ირაკლი ჩხვირკიასა და გური ჟვანიას კი – 5-5 წლით.
ზოდელავასა და ბერიძეს ბრალად ედებოდათ ჯგუფურად სტრატეგიული და განსაკუთრებული მნიშვნელობის ობიექტების ხელში ჩაგდებისა და ბლოკირების მცდელობა, ასევე ჯგუფური ძალადობის ორგანიზება და ხელმძღვანელობა. მურთაზ ზოდელავას დამატებით ბრალი წარდგენილი ჰქონდა კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ მოწოდების მუხლითაც.
საპროცესო შეთანხმების დამტკიცების შედეგად ოთხივე მსჯავრდებულს თავდაპირველად შეფარდებული სასჯელი შეუმცირდა.
