რუსეთის ბრიანსკის ოლქის სოფლებზე თავდასხმაზე პასუხისმგებლობა „რუსეთის მოხალისეთა კორპუსმა“ აიღო. ჯგუფის მიერ გავრცელებული ინფორმაციით, კორპუსის წევრები ბრიანსკის ოლქში შევიდნენ, რათა აჩვენონ თანამემამულეებს, რომ არის იმედი და თავისუფალ რუს ხალხს იარაღით ხელში შეუძლია რეჟიმთან ბრძოლა.
„მეგობრებო, აი, ეს არის. „რუსეთის მოხალისეთა კორპუსმა“ გადაკვეთა რუსეთის ფედერაციის სახელმწიფო საზღვარი. ჩვენ არ ვებრძვით მშვიდობიან მოსახლეობას, ჩვენ არ ვკლავთ უიარაღოებს. ახლა დროა, რუსეთის რიგითმა მოქალაქეებმა გაიგონ, რომ ისინი მონები არ არიან. აწიეთ ბუნტი, იბრძოლეთ“, – აცხადებს ჯგუფის ერთ-ერთი წევრი ვიდეოში.
მებრძოლების ვიდეოში ბრიანსკის ოლქის სოფელ ლუბეჩანის სამედიცინო და სამეანო პუნქტის ნიშანი ჩანს. ამის შემდეგ ბრიანსკის რეგიონიდან „რუსეთის მოხალისეთა კორპუსის“ კიდევ ერთი ვიდეო გამოქვეყნდა.
„ჩვენ, „რუსეთის მოხალისეთა კორპუსის“ მებრძოლები, ვიღებთ ამ ვიდეოს ბრაიანსკის რეგიონიდან. ჩვენ აქ მოვედით არა როგორც დივერსიულ-სადაზვერვო ჯგუფი, არამედ როგორც განმათავისუფლებელი არმია ჩვენს მშობლიურ მიწაზე. პუტინის ჯალათებისა და მოძალადეების არმიისგან განსხვავებით, ჩვენ არ ვიბრძვით მშვიდობიანი მოსახლეობის წინააღმდეგ. ჩვენ აქ ვართ თქვენს გასათავისუფლებლად. მოგიწოდებთ, აიღოთ იარაღი და შეებრძოლოთ პუტინის სისხლიან კრემლის რეჟიმს“, – აცხადებს ვიდეოში ერთ-ერთი მებრძოლი.
დღეს რუსულმა მედიამ, ბრიანსკის გუბერნატორზე, ალექსანდრე ბოგომაზზე დაყრდნობით, გაავრცელა ინფორმაცია, რომ „უკრაინელი შეიარაღებული პირები რუსეთის ბრიანსკის ოლქის სოფელ ლუბეჩანში შევიდნენ და რამდენიმე ადამიანი მძევლად აიყვანეს“.
ბრიანსკის რაიონში არსებულ ვითარებაზე განცხადება გაკეთდა უკრაინის შეიარაღებულ ძალებშიც. კიევში განაცხადეს, რომ „უკრაინის შეიარაღებული ძალები იბრძვიან უკრაინის ტერიტორიაზე, რუსეთის ფედერაციის ბრიანსკის ოლქში განვითარებული მოვლენები კი მოსკოვის თავხედური პროვოკაციაა“.
