ევროპის ახალგაზრდულ ჩემპიონატზე ჯგუფური ეტაპის მესამე ტურის მატჩი საქართველოს ნაკრებმა ნიდერლანდების წინააღმდეგ გამართა და მიზანს მიაღწია. რამაზ სვანაძის გუნდი ამ შეხვედრამდე პირველ ადგილზე იყო და ევრო 2023-ის მეოთხედფინალში გასასვლელად ქულაც ჰყოფნიდა. თუმცა, ეს ქულა იოლი მოსაპოვებელი ნამდვილად არ იყო – მეტოქე, ნიდერლანდები სერიოზული გუნდია და ეს თამაშმაც დაადასტურა.
ნიდერლანდელებს მხოლოდ მოგება აწყობდათ და პირველივე წუთებიდან აგრესიულად შეუტიეს. ისინი ჩვენს ნახევარზე იოლად გადადიოდნენ და ორი რეალური საგოლე მომენტი შექმნეს. ორივეჯერ კენეთ ტეილორმა დაარტყა და ორივეჯერ ძელმა გადაგვარჩინა. ასეთი თამაშიდან გამოსავალი ზურიკო დავითაშილმა იპოვა, მარჯვენა ფლანგიდან წამოწყებული დრიბლინგის შემდეგ სტუმართა მთელი დაცვა მოატყუა, კარის წინ ბურთის გასწორებაც მოასწრო და „დინამო არენაზე“ შეკრებილი 54 ათასი მაყურებელი უზომოდ გაახარა. თუმცა, ტაიმის ბოლო წამზე კენეთ ტეილორმა ანგარიში გაათანაბრა 1:1.
მეორე ტაიმში ნიდერლანდების ნაკრები დიდ უპირატესობას ფლობდა. ჩვენი გუნდი კი ისევ კონტრშეტევების იმედად იყო. ერთ-ერთი ასეთ იერიშის დაგვირგვინებას დავითაშვილი ცდილობდა, მაგრამ მეკარემ საიმედოდ ითამაშა. საბოლოოდ, მძიმე და დაძაბული თამაში 1:1 დასრულდა და საქართველოს ახალგაზრდულმა ნაკრებმა ევროპის ჩემპიონატის მეოთხედფინალის საგზური მოიპოვა.
საქართველო U21 – ნიდერლანდები U21 1:1გოლები – 1:0 დავითაშვილი (43), 1:1 კენეთ ტეილორი (45+4)
