ადვოკატის განმარტებით, სარჩელი ტელეკომპანიების მიერ გავრცელებულ სიუჟეტებში ბერა ივანიშვილის შესახებ გაჟღერებულ ინფორმაციას ეხება, რომელსაც მოსარჩელე ცრუ და ცილისმწამებლურად მიიჩნევს. ივანიშვილი სასამართლოსგან აღნიშნული ცნობების უარყოფასა და ცილისწამებად აღიარებას მოითხოვს.
„გვაქვს რამდენიმე ფაქტი, რომელიც გავრცელებულია ყველანაირი გადამოწმების, ჟურნალისტური გულისხმიერებისა და მსგავსი საფუძვლების გარეშე და პირდაპირ ეხება დანაშაულის დაბრალებას, მის კრიმინალურ გარჩევებთან რაღაც ჰიპოთეტურ კავშირს“, – განაცხადა ასათიანმა.
მისივე მტკიცებით, ბოლო პერიოდში ბერა ივანიშვილის წინააღმდეგ სხვადასხვა ტელეკომპანიის, პოლიტიკოსისა და საჯარო პირის მხრიდან კოორდინირებული საინფორმაციო კამპანია მიმდინარეობს, რომელიც მის პატივს, ღირსებასა და რეპუტაციას აზიანებს.
ადვოკატმა აღნიშნა, რომ ბერა ივანიშვილი მუსიკოსი, კომპოზიტორი და პროდიუსერია, პოლიტიკურ საქმიანობაში არ მონაწილეობს და მის წინააღმდეგ გავრცელებულ ბრალდებებს სამართლებრივი გზით დაუპირისპირდება.
„ყველა ადამიანს აქვს პატივი, ღირსება და რეპუტაცია. მისი უფლებაა, ასეთ განცხადებებს სამოქალაქო სამართლებრივი გზით დაუპირისპირდეს და იმ ადამიანებმა, ვინც შეგნებულად თუ შეუგნებლად გაავრცელეს ცილისმწამებლური განცხადებები, პასუხი აგონ“, – განაცხადა დავით ასათიანმა.
