საქართველოს ეროვნული ბანკის პრეზიდენტის მოვალეობის შემსრულებელის, ნათია თურნავას მტკიცებით, ცვლილება არ ეხება რომელიმე პირის დაცვას და სანქციებიდან თავის არიდებას.
თურნავას განცხადებით, ვიდრე ძალაში არ შევა საქართველოს სასამართლოს გამამტყუნებელი განაჩენი, სანქციების აღსრულება იქნება შეჩერებული.
"ეროვნული ბანკი ასრულებდა და მომავალში შეასრულებს საერთაშორისო ვალდებულებებს. არ იქცევა სანქციებისთვისა თავის არიდების ადგილად.
ერთგული ვრჩებით საერთაშორისო ვალდებულებების, თუმცა გამომდინარე იქიდან რომ პირველი პრეცენდენტი შეიქმნა, მივიღეთ გადაწყვეტილება, გამომდინარე იქიდან, რომ შეიქმნა პირველი პრეცედენტი, რომ სანქციების აღსრულება შეეხო საქართველოს მოქალაქეს და ჩვენი გადაწყვეტილებაც პრეცედენტულია, ვრცელდება და ამიერიდან გავრცელდება თითოეულ საქართველოს მოქალაქეზე და დავაწესეთ, ასეთ დროს საქართველოს სანქცირებულ მოქალაქესთან მიმართებაში სანქციების აღსრულების განსხვავებული წესი. კერძოდ, ჩვენ შევიტანეთ დაზუსტება ეროვნული ბანკის პრეზიდენტის ბრძანებით დამტკიცებულ წესში. ამ წესით გათვალისწინებულ სანქციათა რეჟიმი ვრცელდება საქართველოს მოქალაქეზე და მათ მიერ შექმნილ იურიდიულ პირებზე მხოლოდ იმ შემთხვევაში, თუ მათ მიმართ დაწესებულ სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი.
ეს ცვლილება ეხება მხოლოდ და მხოლოდ საქართველოს მოქალაქეებს, არ ეხება რომელიმე კონკრეტულ პირს, იმიტომ რომ ინტერპრეტაციები გაჩნდა. ჩვენთვის მნიშვნელობა არ აქვს საქართველოს სანქცირებული მოქალაქის სახელს და გვარს, აქედან გამომდინარე, ის, რომ ეს გადაწყვეტილება რომელიმე კონკრეტული პირის დაცვას და სანქციებიდან თავის არიდებას მიებას, ამ გადაწყვეტილების პოლიტიზების მცდელობაა. ჩვენ ვართ სუვერენული სახელმწიფოს ეროვნული ინსტიტუცია, ვასრულებთ და პატივს ვცემთ ყველა საერთაშორისო ვალდებულებას, მაგრამ ჩვენს ქმედებებში ვხელმძღვანელობთ და ამოვდივართ საქართველოს კონსტიტუციით და კანონმდებლობით. შესაბამისად, ჩვენი ვალდებულებაა, როდესაც სანქცია საქართველოს ნებისმიერ მოქალაქეს შეეხება, ამ სანქციის აღსრულების პროცესში ზედმიწევნით იყოს დაცული კონსტიტუციით განსაზღვრული ფუნდამენტური უფლებები და ეს აღსრულება მოხდეს კონსტიტუციასთან და კანონმდებლობასთან შესაბამისობაში. ეს არის ჩვენი გადაწყვეტილების მთავარი არსი“, - განაცხადა ნათია თურნავამ.
