ქართული ბიზნესის მხარდასაჭერად თიბისიმ EIB-სგან 70 მილიონი მოიზიდა
22.12.2023 ნახვები: 490
ქართული ბიზნესების მხარდასაჭერად, თიბისი ბანკმა ევროპის საინვესტიციო ბანკთან (EIB) 70 მილიონი ევროს მოცულობის სასესხო ხელშეკრულება გააფორმა. აღნიშნული დაფინანსება საქართველოში მცირე და საშუალო საწარმოებისა (SMEs) და საშუალო კაპიტალის მქონე კომპანიების მხარდაჭერას ითვალისწინებს. სესხი აგრეთვე განკუთვნილია მწვანე ინვესტიციებისთვის, გენდერული თანასწორობის ხელშემწყობი და ქალთა გაძლიერების ინიციატივებისთვის.
„ჩვენ ვამაყობთ ევროპის საინვესტიციო ბანკთან (EIB) წარმატებული პარტნიორობით, რომელიც უკვე ათწლეულზე მეტია გრძელდება. ამ უმნიშვნელოვანესი ტრანზაქციის განხორციელება ჩვენს ორგანიზაციებს შორის მტკიცედ დამყარებული, ძლიერი პარტნიორობის კიდევ ერთი დასტურია და ხაზს უსვამს ჩვენს საერთო ღირებულებას - ხელი შევუწყოთ საქართველოს ეკონომიკის მდგრად განვითარებას. მიღებული ფინანსური რესურსი თიბისის საშუალებას მისცემს, გააგრძელოს საქართველოში მცირე და საშუალო ბიზნესის მხარდაჭერა - უფრო ხელმისაწვდომი, გრძელვადიანი დაფინანსების უზრუნველყოფით, რაც თავის მხრივ მიზნად ისახავს ეკონომიკური ზრდის სტიმულირებას და სამუშაო ადგილების შექმნას. გარდა ამისა, განსაკუთრებულ ფოკუსირებას მოვახდენთ კლიმატთან დაკავშირებულ ინვესტიციებსა და ქალ მეწარმეებზე, რათა გაუმჯობესდეს მდგრადი ბიზნეს გარემო ქვეყანაში“. - განაცხადა ვახტანგ ბუცხრიკიძემ, თიბისი ბანკის გენერალურმა დირექტორმა.
სესხს მხარს უჭერს გერმანიის მთავრობის მიერ დაფინანსებული კლიმატის საერთაშორისო ინიციატივა, ტექნიკური დახმარების პროგრამის „ფინანსური სისტემების გამწვანება' ფარგლებში.
„ევროკავშირის ეკონომიკური და საინვესტიციო გეგმა აღმოსავლეთ პარტნიორობისთვის არის ევროკავშირი-საქართველოს თანამშრომლობის ძირითადი საყრდენი მომავალი წლებისთვის. მას დასახული აქვს ამბიციური მიზნები და განსაზღვრავს მნიშვნელოვან საფლაგმანო ინიციატივებს, მათ შორის, ჩვენს მხარდაჭერას 80,000 ქართული მცირე და საშუალო საწარმოსთვის. ევროკავშირი მოხარულია, რომ მხარს უჭერს დღევანდელ სასესხო ხელშეკრულებას, რომელიც მდგრადი და ინკლუზიური მიდგომაა ფინანსებზე ხელმისაწვდომობისა და სამუშაო ადგილების შექმნის უზრუნველსაყოფად. უფრო ინკლუზიური, უფრო მწვანე ეკონომიკური სექტორი გადამწყვეტია საქართველოს ეკონომიკისა და საზოგადოების განვითარებისა და მდგრადობისთვის. ევროკავშირის ამ პრიორიტეტებზე მუშაობა - უფრო ინკლუზიური, უფრო მწვანე ეკონომიკა - დაეხმარება საქართველოს ევროკავშირის გზაზე წინსვლისთვის.” - განაცხადა ევროკავშირის ელჩმა საქართველოში პაველ ჰერჩინსკიმ.
EIB-ის ვიცე-პრეზიდენტმა ტერეზა ჩერვინსკამ, რომელიც პასუხისმგებელია ბანკის საქმიანობაზე საქართველოში, აღნიშნა: „EIB მოხარულია, რომ მხარს უჭერს ქართულ მცირე და საშუალო ბიზნესს ამ ინოვაციური სესხის მეშვეობით, რომლის შუამავალს წარმოადგენს საქართველოს ერთ-ერთი წამყვანი ბანკი, თიბისი ბანკი. იგი ინოვაციურია, რადგან სესხის მნიშვნელოვანი ნაწილი კონკრეტულად არის გამოყოფილი მწვანე და ინკლუზიური დაფინანსებისთვის, რომელიც ორიენტირებულია გენდერულ თანასწორობაზე. მცირე საწარმოების მხარდაჭერის ვალდებულება, ევროკავშირთან ძალიან მჭიდრო თანამშრომლობით მწვანე და ინკლუზიურ დაფინანსებაზე ფოკუსირებასთან ერთად, ჰარმონიულად შეესაბამება EIB-ის პრიორიტეტებს.”
ევროპის საინვესტიციო ბანკი (EIB) არის ევროკავშირის გრძელვადიანი საკრედიტო ინსტიტუტი, რომელიც ეკუთვნის მის წევრ სახელმწიფოებს. იგი უზრუნველყოფს გრძელვადიან დაფინანსებას ჯანსაღი ინვესტიციებისთვის ევროკავშირის პოლიტიკის მიზნების მისაღწევად, პროექტების მხარდაჭერას ოთხ პრიორიტეტულ სფეროში: ინფრასტრუქტურა, ინოვაცია, კლიმატი და გარემო და მცირე და საშუალო საწარმოები.
EIB Global არის EIB ჯგუფის სპეციალიზებული ფილიალი, რომლის მიზანია საერთაშორისო პარტნიორობისა და განვითარების დაფინანსების გავლენის გაზრდა, რაც ხელს უწყობს ევროკავშირის სამ მთავარ პრიორიტეტს: მწვანე შეთანხმება, გლობალური კარიბჭეები, სამუშაო ადგილები და მდგრადი და ინკლუზიური ეკონომიკური ზრდა. ევროპის გუნდის ფარგლებში, EIB Global ხელს უწყობს ძლიერ, ორიენტირებულ პარტნიორობას განვითარების პარტნიორ საფინანსო ინსტიტუტებთან და სამოქალაქო საზოგადოებასთან ერთად სხვა მრავალმხრივ განვითარების ბანკებთან მჭიდრო თანამშრომლობით. EIB Global აახლოებს EIB ჯგუფს ადგილობრივ მოსახლეობასთან, კომპანიებთან და ინსტიტუტებთან ჩვენი ოფისების მეშვეობით მთელ მსოფლიოში.
