ტოლერანტობის ცენტრის წარმომადგენელი, ბექა მინდიაშვილი პარლამენტის თავმჯდომარეს, შალვა პაპუაშვილს პასუხობს.
მისი თქმით, პაპუაშვილის მხრიდან გაკეთებული განცხადებები მიზანმიმართული კამპანიაა, რაც ტოლერანტობის ცენტრი დასუსტებას ისახავს მიზნად.
"ჩემი აზრით, კატასტროფის ტოლფასია, როცა პარლამენტის თავმჯდომარე ამ ტრიბუნას იყენებს კონკრეტულად ერთი ადამიანის, ამ შემთხვევაში ჩემს წინააღმდეგ, რაღაცნაირად დასაგეშად საზოგადოების, როცა მტრად მაცხადებს. ასევე, სრული არაკომპენტენტურობის მაჩვენებელია გუშინდელი განცხადება იმასთან დაკავშირებით, თითქოს ტოლერანტობის ცენტრი სახალხო დაცველს ექვემდებარება და მივმართავ სახალხო დამცველს, რომ იღონოს ამ თვალსაზრისით. ეს არის მიზანმიმართული კამპანია საიმისოდ, რომ ტოლერანტობის ცენტრი დაასუსტოს ან ტოლერანტობის ცენტრის გაუქმება მოითხოვოს და მიზანს მიაღწიოს ამ თვალსაზრისით.
რაკი ახსენა რუსული კანონი, ეს არის პარლამენტი, რომლის უმრავლოსობა და თავმჯდომარე ხელს აწერდა საქართველოს პირდაპირ გადაბარგებას რუსეთში, რუსული კანონის მიღებით და შესაბამისად, შესაძლოა, აი, ასეთი ტიპის კანონის შემოტრიალება სურდეთ. არ არის ეს გამორიცხული", - ამბობს მინდიაშვილი.
პარლამენტის თავმჯდომარე, შალვა პაპუაშვილი სოვლაბის წევრს, გიორგი კანდელაკს, ასევე, ტოლერანტობის ცენტრის წარმომადგენელს, ბექა მინდიაშვილს ესხმის თავს და მათ "საქართველოს მართლმადიდებელ ეკლესიაზე თავდასხმაში" ადანაშაულებს.
პაპუაშვილი საუბრობს ბოლო დროს განვითარებულ მოვლენებზე, მათ შორის მაგალითად მოჰყავს იოსებ სტალინის გამოსახულებიანი ხატი და აცხადებს, რომ ეს შეტევა "კოორდინირებულია".
მისი თქმით, "დეზინფორმაციის, მანიპულაციის და ისტერიის" ნაზავი გასცდა ეკლესიაზე აქამდე ნანახი შეტევების მასშტაბს და მიუახლოვდა იმ "საშიშ ზღვარს, რომლის მიღმაც სამოქალაქო მშვიდობისთვის გამოუსწორებელი ზიანის მიყენება შეიძლება იყოს".
პარლამენტის თავმჯდომარე საუბრობს არასამთავრობო სექტორების დაფინანსებაზეც და აცხადებს, რომ "ე.წ. ენჯეო-სექტორი თითქმის სრულად არის დომინირებული პოლიტიკოსების მიერ, რომლებიც უცხოური დაფინანსებით პარტიულ პროპაგანდას ეწევიან".
ის ტოლერანტობის ცენტრის წარმომადგენელს, ბექა მინდიაშვილს "რელიგიურ შეუწყნარებლობასა და რელიგიური ისტერიის გაღვივებაში" ადანაშაულებს და ხაზს უსვამს, რომ ცენტრი USAID-ის ერთ-ერთი პროგრამით ფინანსდება.
