ტრამპი არ იცნობს პუტინს, რადგან მას არასდროს უბრძოლია პუტინთან, – ამის შესახებ უკრაინის პრეზიდენტმა, ვოლოდიმირ ზელენსკიმ „სიენენთან“ ინტერვიუში განაცხადა.
ზელენსკის თქმით, აშშ-ის ყოფილი პრეზიდენტი დონალდ ტრამპი ამერიკელების წინააღმდეგ წავა, თუ ის, უკრაინის ნაცვლად, რუსეთის მხარდაჭერას აირჩევს.
„ვერ ვხვდები, როგორ შეიძლება, დონალდ ტრამპი იყოს რუსეთის პრეზიდენტის, ვლადიმერ პუტინის მხარეს. ეს დაუჯერებელია. ვფიქრობ, დონალდ ტრამპი არ იცნობს პუტინს. ვიცი, რომ ის შეხვდა მას, მაგრამ არასოდეს უბრძოლია პუტინთან. აშშ-ის ჯარისკაცებს არასოდეს უბრძოლიათ რუსეთის ჯარისკაცებთან. არასოდეს. მე უკეთესად მესმის. ვფიქრობ, მას არ ესმის, რომ პუტინი არასოდეს გაჩერდება“, – აღნიშნა ზელენსკიმ.
უკრაინის პრეზიდენტის თქმით, აშშ-ის დახმარების გარეშე უკრაინა არა მხოლოდ ვერ იბრძოლებს ახალი მიღწევებისთვის, არამედ გაუჭირდება თავის დაცვაც.
„ხალხი მომზადებული იქნება, მაგრამ საბრძოლო მასალა არ იქნება და ჯარისკაცები არ იქნებიან მზად. არამხოლოდ ჩვენი კონტრშეტევისთვის, ისინი არ იქნებიან მზად თავდაცვისთვის. ძალიან რთული იქნება“, – განაცხადა ზელენსკიმ.
უკრაინის პრეზიდენტმა აღნიშნა, რომ ესაუბრა წარმომადგენელთა პალატის რესპუბლიკელ სპიკერს, მაიკ ჯონსონს უკრაინისთვის დახმარების პაკეტზე და ამ საუბრის შემდეგ ოპტიმისტურად არის განწყობილი.
„მან თქვა, რომ ყველაფერს გააკეთებს უკრაინის მხარდასაჭერად, ის ჩვენს მხარესაა და ესმის, რომ ჩვენი ხალხი, ჩვენი ჯარისკაცები და მშვიდობიანი მოქალაქეები გმირები არიან“, – განაცხადა ზელენსკიმ.
