დიდი ბრიტანეთის საგარეო საქმეთა მინისტრის, დევიდ ქემერონის განცხადებით, მას სჯერა, რომ უკრაინის დახმარება აშშ-ის ინტერესებშია.
ამის შესახებ ქემერონმა თავის ამერიკელ კოლეგასთან შეხვედრის შემდეგ გამართულ პრესკონფერენციაზე განაცხადა.
ქემერონის თქმით, აშშ-ის კონგრესმა უნდა დაამტკიცოს უკრაინის ფინანსური მხარდაჭერის პაკეტი, რადგან დღეს უკრაინისთვის ამაზე მნიშვნელოვანი არაფერია.
„მე აქ არ ჩამოვსულვარ ლექციების წასაკითხად, ვინმესთვის სათქმელად, რა გააკეთონ ან აშშ-ის პოლიტიკურ თუ სხვა პროცესებში ჩასარევად. აქ ჩამოვედი, როგორც ამ ქვეყნის დიდი მეგობარი და ადამიანი, ვისაც ამ ქვეყნის სჯერა. მჯერა, ამ სახსრების გამოყოფა თქვენს ინტერესებშია, თქვენი უსაფრთხოების, მომავლის და ყველა თქვენი პარტნიორის მომავლის ინტერესშია“, – განაცხადა ქემერონმა.
აღსანიშნავია, რომ ენტონი ბლინკენთან შეხვედრამდე დევიდ ქემერონი აშშ-ის ყოფილ პრეზიდენტს, დონალდ ტრამპს შეხვდა. აღნიშნულთან დაკავშირებით კომენტარის გაკეთებისას ქემერონმა განაცხადა, რომ ტრამპთან განიხილებოდა გეოპოლიტიკური საკითხები, მათ შორის, კონფლიქტი ახლო აღმოსავლეთში და ომი უკრაინაში. დევიდ ქემერონმა დეტალებზე საუბრისგან თავი შეიკავა.
როგორც დონალდ ტრამპის წინასაარჩევნო შტაბის განცხადებაშია საუბარი, აშშ-ის ყოფილმა პრეზიდენტმა და დიდი ბრიტანეთის საგარეო საქმეთა მდივანმა განიხილეს „აუცილებლობა, რომ ნატო-ს წევრმა ქვეყნებმა შეასრულონ თავდაცვის ხარჯების თაობაზე ნაკისრი ვალდებულებები, ასევე, დიდ ბრიტანეთსა და აშშ-ში დაგეგმილი არჩევნები, „ბრექსიტთან“ დაკავშირებული პოლიტიკური საკითხები და უკრაინაში სისხლისღვრის შეჩერების გზები“.
