ევროკომისიის პრეზიდენტის, ურსულა ფონ დერ ლაიენის განცხადებით, შეიქმნება დონორთა ჯგუფი, რომელიც ღაზას რეკონსტრუქციის ხარჯებს დააფინანსებს.
„როდესაც ღამე ყველაზე ბნელია, ჩვენ კომპასს სწრაფად უნდა ჩავეჭიდოთ. ჩვენი კომპასი ორი სახელმწიფოს პრინციპით გადაწყვეტაა. ამ ომის დაწყებიდან ევროპა პალესტინის ხელისუფლების სასიცოცხლო რგოლია, მაგრამ მეტი უნდა გავაკეთოთ. სწორედ ამიტომ შევქმნით პალესტინის დონორთა ჯგუფს. ნებისმიერი მომავალი პალესტინის სახელმწიფო სიცოცხლისუნარიანი უნდა იყოს, მათ შორის ეკონომიკური თვალსაზრისით და მიღწევა შესაძლებელია პალესტინელი მეზობლების მხარდაჭერითაც. ჩვენ, ევროპელები, სხვა დონორების ძალისხმევასთან კოორდინაციით შევქმნით ღაზას რეკონსტრუქციისთვის სპეციალურ ინსტრუმენტს. ღაზა უნდა აღდგეს“, - აღნიშნა ევროკომისიის პრეზიდენტმა.
მისი თქმით, ერთადერთი რეალური სამშვიდობო გეგმა ეფუძნება ორი სახელმწიფოს პრინციპს, უსაფრთხო ისრაელით, სიცოცხლისუნარიანი პალესტინის სახელმწიფოთი და „ჰამასის“ საფრთხის მოხსნით.
გაერო-სა და მსოფლიო ბანკის ანგარიშის თანახმად, ღაზას სექტორის ინფრასტრუქტურისთვის მიყენებულმა ზარალმა 2024 წლის იანვრის ბოლოსთვის ჯამში 18.5 მილიარდი დოლარი შეადგინა. ეს ზარალი აისახა საცხოვრებელ შენობებზე, კომერციულ საქმიანობაზე, მრეწველობასა და ისეთ აუცილებელ სერვისებზე, როგორიცაა განათლება, ჯანდაცვა და ენერგეტიკა.
