ანალიტიკოსი გოჩა მირცხულავა მიიჩნევს, რომ საქართველოში პოლიტიკური კრიზისის ერთ-ერთი მთავარი მიზეზი ხელისუფლებისა და ოპოზიციის მიერ საზოგადოებისათვის მუდმივი მოლოდინების შექმნაა, რომელთა დიდი ნაწილი წლების განმავლობაში არ მართლდება.
მირცხულავას შეფასებით, პოლიტიკური ბოროტება ყოველთვის რეპრესიით, ძალადობით ან ციხით არ იწყება. მისი თქმით, ხშირად ის ტყუილზე, ცრუ დაპირებებსა და ხელოვნურად შექმნილ მოლოდინებზე დგას.
„ერთი მხარე მუდმივად რაღაცის „დალაგების“ პროცესშია ისე, რომ ქვეყანა არასოდეს დალაგდეს, ხოლო მეორე მხარე წლებია ჰყიდის მოლოდინს გარდაუვალი სანქციების, საერთაშორისო ზეწოლისა და ნათელი მომავლის შესახებ ისე, რომ ეს მოლოდინი არასოდეს სრულდება,“ – აცხადებს მირცხულავა.
მისი თქმით, ხელისუფლება ქმნის წესრიგის იმიტაციას, ოპოზიცია კი პოლიტიკური ცვლილების მუდმივ მოლოდინს, რის შედეგადაც საზოგადოება რეალური შედეგების ნაცვლად დაუსრულებელი დაპირებების რეჟიმში ცხოვრობს.
ანალიტიკოსის შეფასებით, სწორედ ასეთ ვითარებაში იქცევა პოლიტიკა რეალური პრობლემების გადაჭრის ინსტრუმენტიდან მოლოდინების მართვის მექანიზმად.
„როდესაც ხელისუფლება პრობლემების მოგვარებას კი არა, მათი მუდმივად მართვადი არსებობის შენარჩუნებას ცდილობს, ხოლო ოპოზიცია ალტერნატივის შექმნის ნაცვლად ხვალინდელი სასწაულის გაყიდვით არის დაკავებული, საბოლოოდ იკარგება სიმართლე, ადამიანი, დრო და რაც მთავარია – სახელმწიფო,“ – აღნიშნავს გოჩა მირცხულავა.
