უკრაინის შეიარაღებული ძალების გენერალური შტაბის ინფორმაციით, 30 ივნისს ფრონტის ხაზზე უკრაინულ და რუსულ ძალებს შორის 256 საბრძოლო შეტაკება დაფიქსირდა.
გენშტაბის მონაცემებით, რუსეთის ძალებმა უკრაინის ტერიტორიაზე ერთი სარაკეტო დარტყმა, 81 საჰაერო იერიში და 3 083 საარტილერიო შეტევა განახორციელეს, მათ შორის 47-ჯერ ზალპური ცეცხლის რეაქტიული სისტემები (MLRS) გამოიყენეს. გარდა ამისა, რუსეთმა 9 801 კამიკაძე-დრონი გამოიყენა და უკრაინის მიმართულებით 246 მართვადი საავიაციო ბომბი ჩამოაგდო.
ამავე ინფორმაციით, უკრაინის საჰაერო ძალებმა, სარაკეტო ჯარებმა და არტილერიამ იერიში მიიტანეს რუსეთის სამხედროების ხუთ თავმოყრის რაიონზე, ხუთ საარტილერიო სისტემაზე, საბრძოლო მასალის ერთ საწყობზე, უპილოტო საფრენი აპარატების მართვის ექვს პუნქტსა და კიდევ ერთ მნიშვნელოვან სამხედრო ობიექტზე.
გენშტაბის ცნობით, ყველაზე ინტენსიური საბრძოლო მოქმედებები პოკროვსკის, სლოვიანსკის, კოსტიანტინივკისა და ჰულიაიპოლეს მიმართულებებზე მიმდინარეობდა, სადაც უკრაინელმა სამხედროებმა ათობით რუსული შეტევა მოიგერიეს.
ამასთან, ორიხივისა და მდინარე დნიპროს მიმართულებებზე გასულ დღე-ღამეში რუსულ ძალებს შეტევითი მოქმედებები არ განუხორციელებიათ, ხოლო ვოლინისა და პოლისიას მიმართულებებზე ახალი რუსული შეტევითი დაჯგუფებების ფორმირების ნიშნები არ გამოვლენილა.
