უკრაინამ ლაზერული საჰაერო თავდაცვის სისტემების ტესტირება დაიწყო. ამის შესახებ, უკრაინული მედიის ცნობით, უკრაინის თავდაცვის მინისტრმა, მიხაილო ფედოროვი განაცხადა.
მინისტრის თქმით, სისტემების გამოცდის პირველადი შედეგები უკვე მიღებულია და ამ ეტაპზე მათ უკრაინელი სპეციალისტები სწავლობენ.
„უკვე ვტესტავთ ლაზერს და გვაქვს გარკვეული შედეგები. ჯერ ბევრს არ ვამხელთ, მაგრამ ეს მიმართულება აქტიურად ვითარდება“, – განაცხადა მიხაილო ფედოროვმა.
მისივე განცხადებით, უკრაინისთვის ერთ-ერთ პრიორიტეტულ მიმართულებად რჩება ხელოვნური ინტელექტის გამოყენებით დაბალფასიანი ფრთოსანი რაკეტების შექმნა.
„შეიძლება ეს ფუტურისტულ პროექტებად ჟღერდეს, მაგრამ ერთ წელიწადში სიახლე აღარ იქნება. ჩვენ ამაზე ვიმუშავებთ“, – აღნიშნა მინისტრმა.
ფედოროვის ინფორმაციით, ამჟამად უკრაინაში ათამდე კომპანია მუშაობს პროექტებზე, რომლებიც მტრის დრონების მოსაგერიებლად იაფფასიანი რაკეტების შექმნას ითვალისწინებს. მისივე თქმით, პარალელურად მიმდინარეობს ბალისტიკური რაკეტებისა და მართვადი საავიაციო ბომბების საწინააღმდეგო სისტემების განვითარებაც.
