საქართველოში ერთიანი ეროვნული გამოცდები მიმდინარეობს. საგამოცდო პროცესი დღეს, 2 ივლისს, ქართული ენისა და ლიტერატურის გამოცდით დაიწყო და 22 ივლისს ფიზიკის გამოცდით დასრულდება.
შეფასებისა და გამოცდების ეროვნული ცენტრის ინფორმაციით, დღეს აბიტურიენტები ქართული ენისა და ლიტერატურის გამოცდას ორ სესიად აბარებენ. ამავე დღეს, პირველ სესიაზე, ოსური ენის გამოცდაც ტარდება.
გამოცდების განრიგის მიხედვით, 6-8 ივლისს უცხოური ენების გამოცდები გაიმართება, 10 ივლისს – მათემატიკის, 13-14 ივლისს – ისტორიის, ხოლო 22 ივლისს აბიტურიენტები ფიზიკის გამოცდას ჩააბარებენ.
რაც შეეხება პედაგოგებს, მასწავლებლის გამოცდებზე დარეგისტრებულები საგამოცდო პროცესში 5 ივლისიდან ჩაერთვებიან.
ამასთან, 17 ივლისს სტუდენტთა საგრანტო კონკურსი გაიმართება, ხოლო საერთო სამაგისტრო გამოცდები 23 და 24 ივლისს ჩატარდება.
შეფასებისა და გამოცდების ეროვნული ცენტრის ცნობით, 2026 წელს საგამოცდო ცენტრები გახსნილია თბილისში, ბათუმში, ზუგდიდში, ქუთაისში, ფოთში, ახალციხეში, გორში, ოზურგეთში, რუსთავში, თელავში, ხულოსა და ამბროლაურში.
