ირანის ისლამური რევოლუციის გუშაგთა კორპუსის განცხადებით, ქვეყანამ ბაჰრეინსა და ქუვეითში მდებარე აშშ-ის სამხედრო ბაზებზე სარაკეტო და დრონებით თავდასხმების ახალი ტალღა განახორციელა.
ირანული მხარის ინფორმაციით, ბაჰრეინში დარტყმები განხორციელდა აშშ-ის საჰაერო ბაზაზე მდებარე ვერტმფრენების ტექნიკური მომსახურებისა და შეკეთების ობიექტებზე, P-8 Poseidon-ის საპატრულო თვითმფრინავების ანგარსა და სამხედრო დრონების მართვის ცენტრზე.
„საპასუხო ოპერაციები გაგრძელდება“, – განაცხადა ისლამური რევოლუციის გუშაგთა კორპუსმა.
ბაჰრეინის შინაგან საქმეთა სამინისტროს ცნობით, ქვეყანაში საჰაერო განგაშის სირენები ჩაირთო და მოსახლეობას თავშესაფრებში გადასვლისკენ მოუწოდეს.
ამასთან, ირანული მედიის ინფორმაციით, დარტყმები განხორციელდა ქუვეითშიც, სადაც სამიზნე აშშ-ის სამხედრო ინფრასტრუქტურა იყო.
ისლამური რევოლუციის გუშაგთა კორპუსი ამტკიცებს, რომ ალი ალ-სალემის ბაზაზე სრულად განადგურდა საწვავის საცავები და Patriot-ის საჰაერო თავდაცვის სისტემები, ხოლო აჰმად ალ-ჯაბერის საჰაერო ბაზაზე FPS-ის სარადარო სისტემა დაზიანდა.
ქუვეითის შეიარაღებულ ძალებს აღნიშნული თავდასხმებისა და ირანული მხარის მიერ გავრცელებული ცნობების შესახებ ინფორმაცია ამ დრომდე არ დაუდასტურებიათ.
