აშშ-ის პრეზიდენტის, დონალდ ტრამპის განცხადებით, რუსეთსა და უკრაინას შორის ომი მისი საპრეზიდენტო ვადის ამოწურვამდე დასრულდება. ამის შესახებ მან Fox News-ის ჟურნალისტ ტრეი ინგსტთან ინტერვიუში განაცხადა.
კითხვაზე, ფიქრობს თუ არა, რომ ომი მისი პრეზიდენტობის პერიოდში დასრულდება, ტრამპმა უპასუხა:
„ვფიქრობ, დიახ. ვფიქრობდი, რომ ეს ყველაზე მარტივი იქნებოდა, რადგან ორივე ლიდერთან კარგი ურთიერთობა მაქვს“, – განაცხადა ტრამპმა.
მისივე თქმით, რუსეთის პრეზიდენტ ვლადიმერ პუტინს მუდმივად ერთსა და იმავე გზავნილს გადასცემს.
„არ მინდა დეტალებში შევიდე, მაგრამ მე ვეუბნები: „ვლადიმერ, დროა შეჩერდე. დროა, ეს ომი დასრულდეს“. ვფიქრობ, ის შეთანხმებისთვის მზად არის“, – აღნიშნა აშშ-ის პრეზიდენტმა.
კითხვაზე, როდის შეიძლება შეთანხმების მიღწევა, ტრამპმა უპასუხა:
„მალე. ტანგოს ორი ადამიანი სჭირდება, მაგრამ ის შეთანხმებისთვის მზად არის“, – განაცხადა დონალდ ტრამპმა.
