ქუთაისში, რამაზ შენგელიას სახელობის სტადიონზე, საფეხბურთო კლუბ „ტორპედოს“ ადმინისტრაციის წარმომადგენლებსა და გულშემატკივრებს შორის სიტყვიერი და ფიზიკური დაპირისპირება მოხდა.
ქომაგები გუნდის მთავარი მწვრთნელის, დირკ შუსტერის, გადადგომას ითხოვდნენ. მათი განცხადებით, პროტესტის მიზეზი კლუბის ბოლო პერიოდის წარუმატებელი შედეგები და დაგროვილი პრობლემებია.
გულშემატკივრების თქმით, ისინი მწვრთნელის წასვლას დიდი ხანია უშედეგოდ ითხოვენ.
ინციდენტის ადგილზე მობილიზებული იყვნენ პოლიციისა და სპეციალური დანიშნულების რაზმის თანამშრომლები.
დირკ შუსტერმა სტადიონის ტერიტორია სამართალდამცველების დახმარებით დატოვა.
