კლინიკა „ვივამედის“ ინფორმაციით, 4 ოქტომბრის საქმეზე მსჯავრდებული, ყოფილი გენერალური პროკურორისა და პოლიტიკოსის, მურთაზ ზოდელავას ჯანმრთელობის მდგომარეობა სტაბილურია.
კლინიკის დირექტორმა ზურაბ ჩხაიძემ „ინტერპრესნიუსთან“ განაცხადა, რომ ზოდელავა სამედიცინო დაწესებულებაში სამი დღის წინ თავბრუსხვევის გამო შეიყვანეს და ამჟამად ნევროლოგის მეთვალყურეობის ქვეშ იმყოფება.
„ჩვენთან ნამდვილად იმყოფება სტაციონარულ მკურნალობაზე. მდგომარეობა დამაკმაყოფილებელია, მაგრამ სხვა დიაგნოზის შესახებ ვერაფერს გეტყვით, რადგან ეს პირადი ინფორმაციაა და მისი გასაჯაროების უფლება არ მაქვს. შემოსულია თავბრუსხვევით, ინსულტზე არ არის საუბარი. ჩატარებული აქვს ყველა საჭირო და აუცილებელი კვლევა“, – განაცხადა ზურაბ ჩხაიძემ.
ცნობისთვის, მურთაზ ზოდელავას 4 ოქტომბრის საქმეზე 7 წლით თავისუფლების აღკვეთა აქვს მისჯილი. მას ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის „ა“ ქვეპუნქტით აქვს წარდგენილი, რაც სტრატეგიული და განსაკუთრებული მნიშვნელობის ობიექტის ხელში ჩაგდებისა და ბლოკირების მცდელობას, ჯგუფურად ჩადენილს, გულისხმობს.
