4 ოქტომბრის საქმის ერთ-ერთმა მსჯავრდებულმა პაატა ბურჭულაძემ განაცხადა, რომ 4 ოქტომბრის აქციის ორგანიზატორი თავად იყო და, მისი შეფასებით, პროვოკაცია რომ არ მომხდარიყო, აქცია მშვიდობიანად დასრულდებოდა.
„4 ოქტომბრის ორგანიზატორი ვარ მე. რომ არა პროვოკაცია, ძალიან მშვიდობიანად ჩაივლიდა ყველაფერი. პაატა მანჯგალაძე ორგანიზების ნაწილში საერთოდ არ იყო. ბედნიერი ვარ, რომ 4 ოქტომბრის ორგანიზატორი ვარ“, – განაცხადა ბურჭულაძემ.
განცხადება თბილისის სააპელაციო სასამართლოში მიმდინარე პროცესზე გაკეთდა, სადაც 4 ოქტომბერს ათონელის სასახლესთან განვითარებული მოვლენების საქმეზე მსჯავრდებულების საჩივრები განიხილება.
პირველი ინსტანციის სასამართლომ პაატა ბურჭულაძეს, მურთაზ ზოდელავას, ირაკლი ნადირაძეს, ლაშა ბერიძესა და პაატა მანჯგალაძეს 7-წლიანი, ხოლო თორნიკე მჭედლიშვილს, გური ჟვანიას, ნიკა გვენცაძესა და ირაკლი ჩხვირკიას 5-წლიანი თავისუფლების აღკვეთა მიუსაჯა. ირაკლი შაიშმელაშვილს 2 წლით თავისუფლების აღკვეთა შეეფარდა. განაჩენი დაცვის მხარემ სააპელაციო სასამართლოში გაასაჩივრა.
საქმის მასალების მიხედვით, ბრალდებულებს სხვადასხვა მუხლით ედავებიან, მათ შორის სტრატეგიული ობიექტის ხელში ჩაგდებისა და ბლოკირების მცდელობას, ჯგუფური ძალადობის ორგანიზებასა და მონაწილეობას, ასევე კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ საჯარო მოწოდებას.
