საერთაშორისო უფლებადამცველი ორგანიზაცია Freedom House ჟურნალისტ ვახო სანაიას 14-დღიანი ადმინისტრაციული პატიმრობის გამო შეშფოთებას გამოთქვამს და აცხადებს, რომ მისი დაპატიმრება გამოხატვის თავისუფლების აშკარა დარღვევაა.
ორგანიზაციის განცხადებით, სანაიას წინააღმდეგ მიღებული გადაწყვეტილება ხელისუფლების კრიტიკოსების გაჩუმების მცდელობების გაგრძელებაა.
„შეშფოთებულები ვართ ჟურნალისტ ვახო სანაიასთვის ორკვირიანი ადმინისტრაციული პატიმრობის შეფარდების გამო. სანაიას დაპატიმრება Facebook-ზე გამოქვეყნებული პოსტის გამო, რომელშიც საქართველოს მმართველ პარტიას აკრიტიკებდა, მისი გამოხატვის თავისუფლების აშკარა დარღვევაა და მთავრობის მიერ კრიტიკოსების გაჩუმების შემაშფოთებელი მცდელობების სერიის უკანასკნელი მაგალითია“, – წერს Freedom House.
ამასთან, ორგანიზაცია საქართველოს ხელისუფლებას ვახო სანაიას დაუყოვნებლივ და უპირობოდ გათავისუფლებისკენ მოუწოდებს.
შეგახსენებთ, თბილისის საქალაქო სასამართლომ ჟურნალისტ ვახო სანაიას პარლამენტის თავმჯდომარის შალვა პაპუაშვილისა და დეპუტატ ვლადიმერ ბოჟაძის შესახებ სოციალურ ქსელში გამოქვეყნებული პოსტის გამო 14-დღიანი ადმინისტრაციული პატიმრობა შეუფარდა.
