მწერალ ნოდარ დუმბაძის შვილიშვილი, ნოდარ თოფურიძე, იუმორისტ ონისე ოქრიაშვილზე განხორციელებულ ფიზიკურ თავდასხმას სოციალურ ქსელში გამოეხმაურა და განაცხადა, რომ ბაბუის სახელით ძალადობა მიუღებელია.
„ბაბუაჩემის სახელით ადამიანის ცემა ან პროვოკატორის ნახელავი უნდა იყოს, ან იდიოტის. ესაა ჩემი კომენტარი,“ – წერს ნოდარ თოფურიძე.
შეგახსენებთ, რომ იუმორისტ ონისე ოქრიაშვილს ფიზიკურად გაუსწორდნენ. მისი მეუღლის განცხადებით, თავდასხმა მწერალ ნოდარ დუმბადის გარშემო განვითარებულ მოვლენებს უკავშირდება.
„სამმა ბიჭმა ქუჩაში გააჩერა, შენ ხომ ის ხარ, ნოდარ დუმბაძეს რომ აგინაო და დაუწყეს ცემა,“ – განაცხადა ოქრიაშვილის მეუღლემ.
ცნობისთვის, რამდენიმე დღის წინ ონისე ოქრიაშვილმა ერთ-ერთ პოდკასტში ნოდარ დუმბაძეზე ისაუბრა, რასაც საზოგადოების ნაწილის მხრიდან უარყოფითი შეფასებები მოჰყვა.
მოგვიანებით იუმორისტმა ვიდეომიმართვა გაავრცელა, სადაც განმარტა, რომ მისი სიტყვები კონტექსტიდან იყო ამოჭრილი და მწერლისთვის შეურაცხყოფა არ მიუყენებია.
„სულ რომ ბოლო ადგილზე იყო ტექსტის და მოსმენილის გააზრების რეიტინგში, აქ ხომ სავსებით ნათელია, რომ [ნოდარ დუმბაძის მიმართ] გინება კი არ არის. ჰიპოთეზურად ვლაპარაკობთ, ვინ შეიძლება ეზიზღებოდეს ამ ადამიანს და ყველაზე აბსურდული, რაც იმ მომენტში მახსენდება, არის ნოდარ დუმბაძე,“ – განაცხადა ონისე ოქრიაშვილმა.
