აშშ-ის პრეზიდენტმა დონალდ ტრამპმა განაცხადა, რომ ირანის წინააღმდეგ უპრეცედენტოდ მასშტაბური სამხედრო დარტყმის შესაძლებლობას განიხილავს. ამის შესახებ მან გამოცემა Axios-თან ინტერვიუში ისაუბრა.
„განვიხილავ მასიურ დარტყმას. უფრო დიდს, ვიდრე ოდესმე. ახლოს ვარ გადაწყვეტილების მიღებასთან. სრულიად მზად ვართ ამისთვის“, – განაცხადა ტრამპმა.
მისი თქმით, ისრაელი ოპერაციას „ორ წუთში შემოუერთდება“, თუ ამას აშშ სთხოვს, თუმცა დასძინა, რომ ახალი სამხედრო ოპერაციის დასაწყებად ვაშინგტონს „არავინ სჭირდება“.
ტრამპმა ასევე აღნიშნა, რომ ისრაელის შესაძლო მონაწილეობას „შედეგები“ მოჰყვება, რაც, Axios-ის შეფასებით, სავარაუდოდ, ირანის მხრიდან ისრაელის წინააღმდეგ საპასუხო მოქმედებებს გულისხმობს.
ამასთან, აშშ-ის პრეზიდენტს საბოლოო გადაწყვეტილების მიღების ვადა არ დაუსახელებია. გამოცემასთან საუბარში ორმა ამერიკელმა მაღალჩინოსანმა განაცხადა, რომ გადაწყვეტილება ჯერ მიღებული არ არის და სამხედროებს ახალი ბრძანებები ამ დრომდე არ მიუღიათ.
