ნორვეგიის ახალი მეფე 53 წლის ჰააკონ VIII გახდა. მან ტახტი მამის, მეფე ჰარალდ V-ის გარდაცვალების შემდეგ ავტომატურად დაიკავა. ინფორმაციას Associated Press ავრცელებს.
ჰააკონ VIII-ის გამეფების შემდეგ მისი მეუღლე მეტე-მარიტი ნორვეგიის დედოფალი გახდა, ხოლო მეფის უფროსი შვილი, პრინცესა ინგრიდ ალექსანდრა — მემკვიდრე პრინცესა და ტახტის პირველი მემკვიდრე.
ჰააკონი ჰარალდ V-ის უმცროსი შვილია. იგი ტახტის მემკვიდრე 1991 წელს, ბაბუის — მეფე ოლავ V-ის გარდაცვალებისა და ჰარალდ V-ის გამეფების შემდეგ გახდა. მიუხედავად იმისა, რომ ჰააკონს უფროსი და, პრინცესა მართა ლუიზა ჰყავს, იმ დროს მოქმედი მემკვიდრეობის წესის შესაბამისად ტახტის მემკვიდრედ სწორედ ჰააკონი განისაზღვრა. მოგვიანებით ნორვეგიაში კანონი შეიცვალა და ტახტის მემკვიდრეობისას უპირატესობა სქესის მიუხედავად პირველ შვილს მიენიჭა, თუმცა ცვლილება უკუძალით არ გავრცელებულა.
ნორვეგიის მეფე ჰარალდ V 89 წლის ასაკში ოსლოს ეროვნულ საავადმყოფოში გარდაიცვალა. ბოლო პერიოდში მისი ჯანმრთელობის მდგომარეობა გაუარესებული იყო და ჰააკონი მამის მოვალეობებს რეგენტის სტატუსით არაერთხელ ასრულებდა.
ჰარალდ V ნორვეგიის ტახტზე 1991 წლიდან იმყოფებოდა და გარდაცვალების მომენტისთვის ევროპის ყველაზე ხანდაზმული მოქმედი მონარქი იყო.
