რუსეთმა ღამით კიევზე დრონებითა და ბალისტიკური რაკეტებით მასშტაბური იერიში მიიტანა. უკრაინის ხელისუფლების ბოლო მონაცემებით, დედაქალაქში სულ მცირე 8 ადამიანი დაიღუპა, მათ შორის ექვსი რკინიგზის თანამშრომელი. დაშავებულთა შორის ბავშვებიც არიან.
დარტყმების შედეგად დაზიანდა საცხოვრებელი შენობები და სარკინიგზო ინფრასტრუქტურა. „უკრზალიზნიცას“ ინფორმაციით, ბალისტიკური რაკეტებით სარკინიგზო დეპოსა და სხვა ობიექტებზე განხორციელებულ შეტევას შვიდი ადამიანი ემსხვერპლა, მათგან ექვსი კომპანიის თანამშრომელი იყო.
უკრაინის საგარეო საქმეთა მინისტრის, ანდრეი სიბიგას განცხადებით, ბოლო თავდასხმა კიდევ ერთხელ აჩვენებს, რომ რუსეთის პრეზიდენტი ვლადიმერ პუტინი ომის დასრულების რეალურ სურვილს არ ავლენს.
„ამის ნაცვლად, ის აგრძელებს ტერორის ესკალაციას. უკრაინა მზადაა დაასრულოს ომი ბრძოლის ველზე არსებული რეალობისა და სამართლიანი პირობების საფუძველზე, ულტიმატუმების ნაცვლად“, — აცხადებს სიბიგა.
მისი თქმით, უკრაინის პრეზიდენტი მზად არის პუტინს ნეიტრალურ ტერიტორიაზე, წინაპირობების გარეშე შეხვდეს, რათა მხარეებმა ომის დასრულების რეალისტური გზები განიხილონ, თუმცა რუსეთის პრეზიდენტი ასეთ შეხვედრას კვლავ თავს არიდებს.
სიბიგა დასავლელ პარტნიორებს მოსკოვზე ეკონომიკური ზეწოლის გაძლიერებისა და უკრაინის საჰაერო თავდაცვის შესაძლებლობების გაზრდისკენ მოუწოდებს.
„მოსკოვზე ზეწოლის გაძლიერებას ალტერნატივა არ აქვს. მაშინ, როცა უკრაინა ზრდის ზეწოლას ბრძოლის ველზე, ველით, რომ ჩვენი პარტნიორები გაზრდიან ეკონომიკურ ზეწოლას მოსკოვზე და გააძლიერებენ უკრაინის საჰაერო თავდაცვასა და ენერგეტიკულ მდგრადობას ზამთრის წინ“, — აცხადებს სიბიგა.
მისივე თქმით, საჭიროა სანქციების სწრაფად გამკაცრება რუსეთის ბალისტიკური რაკეტების წარმოების წინააღმდეგ, რუსეთის გაყინული აქტივების სრულად გამოყენებაზე მუშაობის განახლება და დამატებითი სასანქციო ზომების მიღება ევროპასა და მის ფარგლებს გარეთ.
