მოსკოვის „ვნუკოვოსა“ და „შერემეტიევოს“ აეროპორტებში ზედიზედ მეორე ღამეა ფრენებზე შეზღუდვები მოქმედებს მას შემდეგ, რაც უკრაინის პრეზიდენტმა ვოლოდიმირ ზელენსკიმ ავიაკომპანიები და მზღვეველები გააფრთხილა, რომ რუსეთის საჰაერო სივრცე სამოქალაქო ავიაციისთვის უსაფრთხო აღარ არის. ინფორმაციას The Moscow Times ავრცელებს. (Русская служба The Moscow Times)
რუსეთის საავიაციო უწყება „როსავიაციამ“ დაადასტურა, რომ აეროპორტებში თვითმფრინავების მიღებასა და გაფრენაზე დროებითი შეზღუდვები დაწესდა.
Flightradar24-ის მონაცემებით, „შერემეტიევოში“ 21 რეისი გაუქმდა და 235 გადაიდო, ხოლო „ვნუკოვოში“ — 22 რეისი გაუქმდა და 94 გადაიდო. წინა ღამით მუშაობა მოსკოვის სამ აეროპორტში იყო შეჩერებული.
ზელენსკიმ 1 სექტემბერს ავიაკომპანიები და სადაზღვევო კომპანიები გააფრთხილა, რომ რუსეთის მიერ უკრაინის სამოქალაქო ინფრასტრუქტურაზე განხორციელებული დარტყმების საპასუხოდ კიევი რუსეთის ტერიტორიაზე დრონებით შეტევებს გააძლიერებს. 2 სექტემბერს უკრაინის საგარეო საქმეთა მინისტრმა ანდრეი სიბიგამ განაცხადა, რომ კიევმა რუსეთის საჰაერო სივრცის უსაფრთხოებასთან დაკავშირებული რისკების შესახებ სამოქალაქო ავიაციის საერთაშორისო ორგანიზაციასაც (ICAO) ოფიციალურად აცნობა.
უკრაინამ ICAO-ს ასევე მოუწოდა, წევრ სახელმწიფოებს რუსეთის საჰაერო სივრცეში სამოქალაქო ფრენების სრულად აკრძალვისკენ მოუწოდოს. თავის მხრივ, „როსავიაცია“ აცხადებს, რომ უკრაინის მიერ რუსეთის საჰაერო სივრცესთან დაკავშირებით გავრცელებულ დოკუმენტებს იურიდიული ძალა არ აქვს.
