რუსეთის ვოლგოგრადისა და სამარის ოლქებზე დრონებით თავდასხმა განხორციელდა. უკრაინული მედიის ცნობით, იერიშების შედეგად რამდენიმე სამრეწველო ობიექტის ტერიტორიაზე ხანძარი გაჩნდა.
გავრცელებული ინფორმაციით, ვოლგოგრადის ოლქის ქალაქ მიხაილოვკაში ცეცხლი „სებრიაკოვცემენტის“ საწარმოს ტერიტორიაზე გაჩნდა.
დრონებით იერიში განხორციელდა სამარის ოლქზეც. ქალაქ სიზრანში თავდასხმის შედეგად ხანძარი ნავთობგადამამუშავებელ ქარხანაში გაჩნდა. რეგიონში იერიშამდე საჰაერო განგაში იყო გამოცხადებული.
ამასთან, ვრცელდება ინფორმაცია როსტოვის ოლქის ქალაქ ტაგანროგში მდებარე ბერიევის სახელობის საავიაციო სამეცნიერო-ტექნიკურ კომპლექსზე სარაკეტო დარტყმის შესახებ.
რუსეთის ხელისუფლებას აღნიშნულ ობიექტებზე მიყენებული ზიანის მასშტაბისა და შესაძლო მსხვერპლის შესახებ ამ დროისთვის დეტალური ინფორმაცია არ გაუვრცელებია.
