აშშ-ის პრეზიდენტ დონალდ ტრამპის განცხადებით, ბრიტანეთში დაკავებული ხუთი მამაკაცი, რომლებიც იმ სამხედრო ავიაბაზის მახლობლად დააკავეს, რომელსაც ამერიკული ძალები ირანის წინააღმდეგ დარტყმებისთვის იყენებდნენ, ობიექტისთვის სერიოზული ზიანის მიყენებას გეგმავდა. ინფორმაციას Reuters-ი ავრცელებს.
„გაერთიანებულ სამეფოში განხორციელებული დაკავება შესანიშნავი იყო. ბრწყინვალედ შესრულებული საქმე გახლდათ. ჩვენ მათზე საგამოძიებო მოქმედებებს ვაწარმოებდით. ისინი ჩვენს სიმაგრეზე სერიოზული ზიანის მიყენებას გეგმავდნენ და ბრიტანელებთან თანამშრომლობამ შესანიშნავი შედეგი გამოიღო. მათ დიდი ხნის განმავლობაში ვაკვირდებოდით და საბოლოოდ დავაკავეთ“, - განუცხადა ტრამპმა ჟურნალისტებს.
ბრიტანეთის პოლიციამ კვირას ხუთი მამაკაცი ასაფეთქებელ ნივთიერებებთან და ტერორიზმთან დაკავშირებული დანაშაულების ჩადენის ეჭვით დააკავა. დაკავებები მას შემდეგ განხორციელდა, რაც სამართალდამცველებმა მიიღეს ინფორმაცია, რომ სამხედრო აეროდრომისკენ სამი ფურგონი მიემართებოდა.
პოლიციის კონტრტერორისტული დანაყოფის უფროსი კოორდინატორის, ვიკი ევანსის განცხადებით, გამოძიება საწყის ეტაპზეა და ხუთივე დაკავებული კვლავ პატიმრობაში რჩება.
„მჭიდროდ ვთანამშრომლობთ პარტნიორებთან, რათა ინციდენტის გარემოებები გავარკვიოთ“, - განაცხადა ევანსმა.
Reuters-ის ცნობით, გამოძიებასთან დაახლოებული წყარო ყველაზე სავარაუდო ვერსიად ირანთან დაკავშირებულ მოტივს ასახელებს. ამასთან, გამომძიებლები განიხილავენ რუსეთის შესაძლო დივერსიული ოპერაციისა და ისლამისტური შეთქმულების ვერსიებსაც. დაკავებულთა შესაძლო კავშირები რომელიმე სახელმწიფოსთან ან ორგანიზაციასთან ამ ეტაპზე დადასტურებული არ არის.
წყარო: Reuters
