ევროკავშირი ოთხი კანდიდატი ქვეყნისთვის გაწევრიანების ინდივიდუალური საგზაო რუკების შემუშავებას განიხილავს. საუბარია მონტენეგროზე, უკრაინაზე, მოლდოვასა და ალბანეთზე, რომლებიც ევროკავშირში გაწევრიანების პროცესში ყველაზე წინ არიან წასული. ინფორმაციას Politico ევროკომისიის ორ მაღალჩინოსანზე დაყრდნობით ავრცელებს.
გამოცემის ცნობით, ახალი ინიციატივის მიზანია, კანდიდატ ქვეყნებს ევროკავშირში გაწევრიანების მკაფიო, ეტაპობრივი გზა შესთავაზოს და კონკრეტულად განუსაზღვროს, რა მოთხოვნები უნდა შეასრულონ მოლაპარაკებების მომდევნო ეტაპებზე გადასასვლელად.
საგზაო რუკები ვალდებულებებს ევროკავშირის მოქმედ წევრებსაც დაუწესებს, რომელთა თანხმობაც გაწევრიანების პროცესის წინსვლისთვის აუცილებელია. ამასთან, დოკუმენტებში განისაზღვრება სავარაუდო ვადები რეფორმების ცალკეული ჯგუფების, ე.წ. მოლაპარაკებების კლასტერების, ოფიციალურად დასრულებისთვის.
Politico-ს წყაროების ინფორმაციით, ინიციატივა ამ ეტაპზე არ გავრცელდება გაწევრიანების პროცესის შედარებით ადრეულ ეტაპზე მყოფ ქვეყნებზე, მათ შორის კოსოვოზე, ჩრდილოეთ მაკედონიასა და ბოსნია და ჰერცეგოვინაზე.
საგზაო რუკებს არც საქართველო, თურქეთი და სერბეთი მიიღებენ. გამოცემის განმარტებით, ამ ქვეყნების გაწევრიანების პროცესები დემოკრატიული განვითარებისა და სასამართლო სისტემის მდგომარეობასთან დაკავშირებული შეშფოთების გამო შეჩერებულია.
