მისი შეფასებით, საქართველოს არაერთი სერიოზული გამოწვევა აქვს, მათ შორის ხელისუფლებასთან დაკავშირებული პრობლემები, თუმცა პოლიტიკური მმართველობისგან განსხვავებით, საზოგადოებაში ღრმად ფესვგადგმული მანკიერი ჩვევების შეცვლა გაცილებით რთულია.
„ქართველ ხალხს სჭირს ორი უმძიმესი, თანდაყოლილი, გენეტიკური შავი ჭირი, რომელსაც ვერაფერმა ვერ უშველა. ორივე ეს შავი ჭირი საბჭოური სისტემის მიერ იყო ჩანერგილი, მაგრამ ისიც ფაქტია, რომ ნიადაგი მათთვის ნამდვილად მზად იყო. ეს ორი შავი ჭირია — ქუჩის აკადემია და სუფრის აკადემია. სანამ ეს ორი აკადემია ცოცხალია, სხვა ვერც ერთი აკადემია ვერ გაიხარებს“, — წერს აბლოთია სოციალურ ქსელში.
ანალიტიკოსი განსაკუთრებით მწვავედ აკრიტიკებს ქართული სუფრის თანამედროვე კულტურას. მისი აზრით, ჭარბი ალკოჰოლის მოხმარებაზე, გადაჭარბებულ ქეიფსა და აგრესიულ ქცევაზე დაფუძნებული სუფრა არა ტრადიციული ქართული ღირებულება, არამედ საბჭოთა ეპოქაში ჩამოყალიბებული სოციალური მოვლენაა.
„გრუზინული ტრადიციული სუფრა არის ბოროტება. ჭამა-სმის გრუზინული ტრადიცია არის ბოროტება და დეგრადაცია. მან დაკარგა ყველანაირი ხიბლი, რომელიც შესაძლოა ოდესღაც ჰქონდა, და გადაიქცა სრულ საღორედ“, — აცხადებს ანალიტიკოსი.
აბლოთიას თქმით, ე.წ. სუფრისა და ქუჩის აკადემიების გავლენა მხოლოდ მორალური პრობლემებით არ შემოიფარგლება. ის ამ მოვლენებს უკავშირებს ალკოჰოლის ჭარბ მოხმარებას, ძალადობას, გაუთავებელ დაპირისპირებებსა და საზოგადოების ინფანტილურობას.
„ეს ერი ვერ გაიზარდა. ქუჩაში დადიან 30 წლის ბავშვები, რომლებიც ჩხუბობენ რაღაც სისულელეების გამო. ეს დეგრადაციის კიდევ ერთი საფეხურია“, — აღნიშნავს იგი.
ანალიტიკოსს მაგალითად მოჰყავს საბჭოთა მსახიობის, ზინოვი გერდტის სიტყვები ქართველების შესახებ — „Это прекрасная, детская нация“ („ეს მშვენიერი, ბავშვური ერია“). აბლოთიას ინტერპრეტაციით, მიუხედავად გამონათქვამის კეთილგანწყობილი შინაარსისა, მასში საზოგადოების ინფანტილურობის პრობლემაც იკითხება.
აბლოთია საქართველოს თურქეთსაც ადარებს, სადაც, მისი თქმით, ბოლო პერიოდში წლის რამდენიმე თვეს ატარებს. ანალიტიკოსის დაკვირვებით, თურქეთში რესტორნებისა და საზოგადოებრივი თავშეყრის ადგილების კულტურა უფრო მოწესრიგებულია, ალკოჰოლს ზომიერად მოიხმარენ და აგრესიული დაპირისპირებებიც ნაკლებად შეინიშნება.
მისი შეფასებით, საზოგადოებრივი ქცევის კულტურა ქვეყნის განვითარების ერთ-ერთი მნიშვნელოვანი წინაპირობაა, ხოლო საქართველოში დამკვიდრებული ქუჩური და სუფრის წესები პროგრესს აფერხებს.
„გამოფხიზლდით ბოლოს და ბოლოს. ან მოიშორებთ ამ ორ აკადემიას, ან 50 წელიწადში ამ ტერიტორიაზე სხვა ერები იქნებიან“, — წერს თენგიზ აბლოთია.
