მისი ინფორმაციით, მიმდინარეობს Starlink-ის კავშირის აღდგენა იმ მოწყობილობებისთვის, რომლებიც საათში 160 კილომეტრამდე სიჩქარით გადაადგილდებიან.
ამასთან, ფედოროვი აცხადებს, რომ უკრაინის თავდაცვისთვის განსაკუთრებით მნიშვნელოვანია Starshield-ის სისტემაზე სიჩქარის შეზღუდვის სრულად მოხსნა.
„Starlink-ის კავშირის აღდგენა 160 კმ/სთ-მდე სიჩქარისთვის მიმდინარეობს. Starshield-ისთვის სიჩქარის შეზღუდვის სრულად მოხსნა ახლა კრიტიკულად მნიშვნელოვანია უკრაინის თავდაცვისთვის. მადლობა, ილონ მასკ. თქვენი შემდგომი მხარდაჭერის იმედი გვაქვს“, – წერს ფედოროვი.
მანამდე გავრცელებული ინფორმაციით, უკრაინაში Starlink-ის გამოყენებაზე სიჩქარის შეზღუდვა ამოქმედდა, რის შედეგადაც დადგენილ ზღვარზე სწრაფად მოძრავ მოწყობილობებს სატელიტურ ქსელთან კავშირი უწყდებოდათ.
შეზღუდვა განსაკუთრებით მნიშვნელოვანი იყო სამხედრო დანიშნულების სწრაფი უპილოტო საფრენი აპარატებისთვის, რომელთა მართვისა და მონაცემთა გადაცემის პროცესში სატელიტური კავშირი გამოიყენება.
SpaceX-ის დამფუძნებელმა ილონ მასკმა განმარტა, რომ Starlink და Starshield განსხვავებული დანიშნულებისა და მართვის სისტემებია.
მასკის განცხადებით, Starlink კომერციული მომსახურებაა, რომელსაც SpaceX ფლობს და აკონტროლებს. კომპანიის პოლიტიკის თანახმად, მისი გამოყენება სამოქალაქო და თავდაცვითი მიზნებისთვის არის დაშვებული, თუმცა არა შეტევითი სამხედრო ოპერაციებისთვის.
რაც შეეხება Starshield-ს, მასკის თქმით, ეს სისტემები აშშ-ის მთავრობის საკუთრებაშია და მათი გამოყენების პირობებს, მათ შორის სიჩქარის შეზღუდვებს, ამერიკის სამხედრო უწყებები განსაზღვრავენ, საბოლოო უფლებამოსილება კი აშშ-ის პრეზიდენტს ეკუთვნის.
ფედოროვის განცხადებიდან არ ირკვევა, როდის დასრულდება Starlink-ის კავშირის აღდგენა ან როდის მოიხსნება Starshield-ისთვის დაწესებული შეზღუდვები სრულად.
წყარო: მიხაილო ფედოროვის განცხადება X-ზე
