ამის შესახებ მელონიმ იტალიის პარლამენტში სიტყვით გამოსვლისას განაცხადა და აღნიშნა, რომ მისი მთავრობის პოზიცია უცვლელია – უკრაინის მხარდაჭერა, მოსკოვზე ზეწოლა და ევროატლანტიკური ერთიანობის შენარჩუნება იტალიის საგარეო პოლიტიკის ძირითად მიმართულებებად რჩება.
პრემიერ-მინისტრის თქმით, უკრაინის დახმარების საკითხზე განსხვავებული მოსაზრებები არსებობს, თუმცა პოლიტიკური დებატების მთავარი საგანი არა მშვიდობის აუცილებლობა, არამედ მისი მიღწევის გზებია.
„ვიცი, ამ საკითხზე მწვავე დებატები მიმდინარეობს – როგორც ამ დარბაზში, ისე პოლიტიკურ ძალებს შორის. პატივს ვცემ ამ განსხვავებულ მოსაზრებებს და მესმის კიდეც მათი, რადგან ამ დარბაზში ომი არავის სურს. ჩვენ ყველას მშვიდობა გვინდა. განსხვავება იმაშია, როგორ მიგვაჩნია, რომ ამ მიზანს უნდა მივაღწიოთ“, – განაცხადა მელონიმ.
მისი შეფასებით, უკრაინის სამხედრო და პოლიტიკური მხარდაჭერა სამშვიდობო პროცესს ხელს კი არ უშლის, არამედ რეალური მოლაპარაკებების შესაძლებლობას ქმნის. მელონის თქმით, თუ აგრესორს მოწინააღმდეგის კაპიტულაციის იძულება შეუძლია, მოლაპარაკებების მნიშვნელობა იკარგება.
„ჩემი აზრით, უკრაინის მხარდაჭერა მშვიდობის ალტერნატივა კი არ არის, ეს არის ის, რაც მშვიდობას შესაძლებელს ხდის. რადგან აგრესორს თუ შეუძლია, მოწინააღმდეგეს დანებება მოსთხოვოს, მაშინ მოლაპარაკებები რაღაში გვჭირდება? ოღონდ დანებება მშვიდობა კი არა, დაპყრობაა“, – აღნიშნა იტალიის პრემიერ-მინისტრმა.
მელონიმ განაცხადა, რომ უკრაინის მიერ წინააღმდეგობის შეწყვეტა არა მშვიდობის დამყარებას, არამედ ევროპული სახელმწიფოს ოკუპაციასა და იმპერიული პოლიტიკის დაბრუნებას გამოიწვევდა.
ამ კონტექსტში მან საბჭოთა კავშირის ისტორიული გამოცდილება გაიხსენა და პარალელი გაავლო პრაღასა და ბუდაპეშტში საბჭოთა სამხედრო ინტერვენციებთან, ასევე ბერლინის კედელთან.
„უკრაინამ ხვალ რომ შეწყვიტოს საკუთარი თავის დაცვა, როგორც ამას ბევრი იმედოვნებს ან გვთავაზობს, ჩვენ მშვიდობა არ გვექნებოდა. ჩვენ ვისაუბრებდით ევროპული სახელმწიფოს ოკუპაციასა და საბჭოთა ტიპის იმპერიალიზმის დაბრუნებაზე, რომელსაც ევროპა ნახევარი საუკუნის განმავლობაში იცნობდა“, – განაცხადა მან.
იტალიის მთავრობის მეთაურის თქმით, ევროპამ არ უნდა დაუშვას ისეთი პოლიტიკური წესრიგის დაბრუნება, როდესაც სახელმწიფოების სუვერენიტეტი და ხალხების თავისუფლება სამხედრო ძალის გამოყენებით იზღუდებოდა.
„პირადად მე ის წლები არ მენატრება. არ მენატრება რუსული ტანკები, რომლებმაც პრაღასა და ბუდაპეშტში აჯანყებები ჩაახშეს და არც ბერლინის კედელი მენატრება. ვერავინ დამარწმუნებს, რომ საკუთარი თავისუფლების დამცველთა დანებებას, შეიძლება, მშვიდობა ეწოდოს“, – აღნიშნა მელონიმ.
პრემიერ-მინისტრმა ხაზი გაუსვა, რომ იტალიის ხელისუფლების მიზანი სამართლიანი მშვიდობის მიღწევაა, რადგან, მისი შეფასებით, მხოლოდ ასეთი შეთანხმება უზრუნველყოფს ევროპის უსაფრთხოებასა და გრძელვადიან სტაბილურობას.
„მშვიდობა, რომლის დამყარებასაც ჩვენ ვესწრაფვით და რომლის მისაღწევადაც ვმუშაობთ, მათ შორის, საზოგადოებრივი მხარდაჭერის თვალსაზრისით, გარკვეული ფასის გადახდის მიუხედავად, სამართლიანი მშვიდობაა. მხოლოდ სამართლიანი მშვიდობა შეიძლება იყოს ხანგრძლივი, მხოლოდ სამართლიანი მშვიდობა იცავს ევროპასა და ჩვენს ინტერესებს“, – განაცხადა მან.
მელონის თქმით, იტალია გააგრძელებს უკრაინის მხარდაჭერას, განსაკუთრებული ყურადღებით მშვიდობიანი მოსახლეობის საჭიროებების მიმართ, და მხარს დაუჭერს რუსეთის წინააღმდეგ ზეწოლის შენარჩუნებას.
„ამიტომ მთავრობის პოზიცია უცვლელი რჩება – კიევის მხარდაჭერა, განსაკუთრებული ყურადღებით მშვიდობიანი მოსახლეობის მიმართ, მოსკოვზე ზეწოლა და ევროატლანტიკური ერთიანობა ჩვენი მოქმედების მთავარ საყრდენებად რჩება“, – განაცხადა იტალიის პრემიერ-მინისტრმა.
წყარო: იტალიის მთავრობის ოფიციალური ვებგვერდი
