უკრაინა შეერთებული შტატებისგან სადაზვერვო ინფორმაციას კვლავ იღებს, მათ შორის მოქმედებს რუსეთის ბალისტიკური რაკეტების თავდასხმების შესახებ ადრეული გაფრთხილების სისტემაც. ამის შესახებ უკრაინის პრეზიდენტმა ვოლოდიმირ ზელენსკიმ ოსლოში გამართულ პრესკონფერენციაზე განაცხადა.
„უკრინფორმის“ ცნობით, ზელენსკიმ განცხადება აშშ-ის სპეციალურ წარმომადგენელ სტივ უიტკოფთან შეხვედრის შემდეგ გააკეთა.
უკრაინის პრეზიდენტმა აღნიშნა, რომ ამერიკულ მხარესთან სადაზვერვო ინფორმაციის გაცვლა ეფექტიანად მიმდინარეობს და განსაკუთრებული მნიშვნელობა აქვს სისტემას, რომელიც მოსახლეობას ბალისტიკური რაკეტების მოახლოების შესახებ აფრთხილებს.
„მადლობელი ვართ, რომ სადაზვერვო ინფორმაციის გაცვლა ეფექტიანად მუშაობს. ეს მოიცავს ადრეული გაფრთხილების სისტემასაც, რომელიც უაღრესად მნიშვნელოვანია ჩვენი მოსახლეობისთვის, როგორც ბავშვებისთვის, ისე ზრდასრულებისთვის, რადგან შეტყობინებებს ვიღებთ ბალისტიკური რაკეტების მოახლოების შესახებ. ამიტომ მადლობელი ვართ ამერიკული მხარის. სისტემა მუშაობს და ეს შესანიშნავია“, – განაცხადა ზელენსკიმ.
მისივე ინფორმაციით, აშშ-ის სახელმწიფო მდივან მარკო რუბიოსთან საუბრისას განიხილა სადაზვერვო ინფორმაციის გაცვლის, სატელიტური კავშირის სისტემა Starlink-ისა და Patriot-ის საჰაერო თავდაცვის სისტემების საკითხები.
ზელენსკის განცხადება განსაკუთრებით მნიშვნელოვანია უკრაინისთვის ამერიკული სადაზვერვო მხარდაჭერის გაგრძელებასთან დაკავშირებული კითხვების ფონზე.
უკრაინის პრეზიდენტის თქმით, ამ ეტაპზე ბალისტიკური საფრთხეების შესახებ გაფრთხილების ამერიკული სისტემა ფუნქციონირებს და უკრაინას შესაბამის ინფორმაციას აწვდის.
წყარო: „უკრინფორმი“.
