ისრაელის პრეზიდენტმა ისააკ ჰერცოგმა მთავრობის ფორმირების მანდატი პარტია „იაშარის“ თავმჯდომარეს, გადი აიზენკოტს გადასცა. ამის შესახებ პრეზიდენტმა პოლიტიკური პარტიების წარმომადგენლებთან კონსულტაციების დასრულების შემდეგ განაცხადა, იუწყება Sky News.
ჰერცოგის თქმით, არჩევნების შემდეგ გამართული კონსულტაციები რთული და მწვავე იყო, თუმცა გადაწყვეტილების მიღებისას მთავარი კრიტერიუმი მთავრობის ჩამოყალიბების რეალური შესაძლებლობა გახდა.
„მთავარი კითხვა ასეთია: ვის აქვს მთავრობის ჩამოყალიბების ყველაზე დიდი შანსი? ამიტომ, როგორც პრეზიდენტმა, მივიღე გადაწყვეტილება, მთავრობის ფორმირების მანდატი გადავცე პარტია „იაშარის“ თავმჯდომარეს, გადი აიზენკოტს“, – განაცხადა ჰერცოგმა.
პრეზიდენტის შეფასებით, ისრაელს სჭირდება სტაბილური მთავრობა, რომელიც ქვეყნის წინაშე არსებულ უსაფრთხოების, ეკონომიკურ და პოლიტიკურ გამოწვევებს უპასუხებს.
ჰერცოგმა პრიორიტეტებს შორის დაასახელა თავდაცვის ძალების საჭიროებების უზრუნველყოფა, საზღვრებისა და ურთიერთობების სამართლებრივი მოწესრიგება, ეკონომიკის გაძლიერება და 7 ოქტომბრის მოვლენებით გამოწვეული მძიმე შედეგების დაძლევა.
„ახლა დროა, ხელი გავუწოდოთ ერთმანეთს და გავაკეთოთ ყველაფერი, რაც შეგვიძლია, ქვეყნის ერთიანობისთვის, ისრაელელი ხალხისთვის შევქმნათ საუკეთესო და მაქსიმალურად სტაბილური მთავრობა“, – აღნიშნა პრეზიდენტმა.
თავის მხრივ, გადი აიზენკოტმა ქნესეთის ყველა ფრაქციას ახალი მთავრობის ფორმირების პროცესში თანამშრომლობისკენ მოუწოდა.
„ერთიანობა მხოლოდ პოლიტიკური არგუმენტი კი არა, უმაღლესი პრინციპია, რომელიც ჭეშმარიტ პარტნიორობასა და სიმართლეს გამოხატავს“, – განაცხადა აიზენკოტმა.
მისი თქმით, ისრაელს ახალი ხელმძღვანელობა სასწრაფოდ სჭირდება და ქვეყანამ თავიდან უნდა აიცილოს განმეორებითი არჩევნების მორიგი ციკლი.
