აშშ-სა და ევროპაში საწვავის ფასმა ბოლო ათწლეულის განმავლობაში უმაღლეს ნიშნულს მიაღწია

რუსეთის მიერ უკრაინაში შეჭრისა და მიწოდების ჯაჭვის შეფერხების გამო ბოლო კვირებში აშშ-სა და ევროპაში საწვავის ფასები გაიზარდა და ბოლო ათწლეულის განმავლობაში უმაღლეს ნიშნულს მიაღწია.

სარდინიის სხვადასხვა კუთხიდან ათობით სატვირთო მანქანის მძღოლმა გზატკეცილზე გაფიცვა მოაწყო, რამაც შეაფერხა მოძრაობა. მძღოლები საწვავის მაღალ ფასებს აპროტესტებდნენ და მთავრობის დამატებით მხარდაჭერას მოითხოვდნენ. კუნძულ სარდინიაზე საქონელი ძირითადად საავტომობილო გზით შემოდის. საწვავის მაღალი ღირებულება მძიმედ აისახება სატვირთო მანქანების მძღოლების და სატვირთო სექტორის საქმიანობაზე.

“ასეთი მაღალი ფასების გამო მუშაობას ვერ გავაგრძელებთ, საწვავის გარდა, სხვა ხარჯებიც იზრდება. მუშაობა უკვე შეუძლებელია”,- წუხს ერთ-ერთი სატვირთოს მძღოლი.

პორტუგალიაში გასულ კვირას დიზელის ფასი ლიტრზე 14 ცენტზე მეტით გაიზარდა, ბენზინი კი დაახლოებით რვა ცენტით გაძვირდა.  სატვირთო მანქანების მძღოლები ლისაბონში,  ერთ-ერთ ავტოსადგომზე,  შეიკრიბნენ და ფასების ზრდა გააპროტესტეს.

“ეს დასასრული კი არა დასაწყისია, პროტესტი დღეს დაიწყო და მაშინ დასრულდება, როცა მთავრობა ჩვენს პრობლემებს გამოეხმაურება და მოაგვარებს”, – მიიჩნევს სატვირთოს მძღოლი პორტუგალიიდან.

გერმანიაში იგივე სიტუაციაა. გერმანიის საგზაო ტრანსპორტირების, ლოგისტიკისა და მართვის ასოციაციაში ამბობენ, რომ  ფასების ზრდა  საფრთხეს უქმნის სატრანსპორტო და ლოგისტიკურ ინდუსტრიას. ასოციაციის წარმომადგენლის თქმით, საწვავის და დიზელის ფასები იმდენად სწრაფად გაიზარდა, რომ ასოციაციის ზოგიერთმა წევრმა ვერ შეძლო ამ ხარჯების გადახდა, რამაც ისინი გადახდისუუნარობის საფრთხის წინაშე დააყენა.