უკრაინის სახალხო დამცველის ლუდმილა დენისოვას ინფორმაციით, ბუჩაში ოკუპანტები ადამიანებს სიკვდილამდე აწამებდნენ, თვალებს უწვავდნენ და სხეულის ნაწილებს კვეთდნენ.
დენისოვას თქმით, აწამებდნენ არა მხოლოდ ზრდასრულებს, არამედ ბავშვებსაც.
"ბუჩაში, იაბლუნსკაიას ქუჩაზე რაშისტებს წამების პალატა ჰქონდათ მოწყობილი. გადარჩენილების თქმით, აქ კადიროველების შტაბი იყო. ისინი ადამიანებს ხვრეტდნენ, თვალებს უწვავდნენ, სხეულის ნაწილებს კვეთდნენ, აწამებდნენ სიკვდილამდე არა მხოლოდ ზრდასრულებს, არამედ ბავშვებსაც. ადგილობრივი ხელისუფლების ინფორმაციით, სულ ბუჩაში ამ დროისთვის 360 მშვიდობიანი მოქალაქეა მოკლული, რომელთა შორის სულ მცირე 10 ბავშვია", - აღნიშნა დენისოვამ.
ომბუდსმენის განცხადებით, გოსტომელსა და ირპენს შორის მდებარე ტყეში ადგილობრივმა მოსახლეობამ იპოვა დაცხრილული ავტომობილი, რომლითაც ოჯახი გადაადგილდებოდა.
დენისოვამ მოუწოდა გაეროს ადამიანის უფლებათა დაცვის კომიტეტს გაითვალისწინოს ეს ფაქტები.
