ევროპის აუდიტორთა სასამართლოს ანგარიშის მიხედვით, ევროპული სასაზღვრო და სანაპირო დაცვის სააგენტო „ფრონტექსი" მოვალეობებს საკმარისად ეფექტურად ვერ ასრულებს.
მოხსენებაში აღნიშნულია, რომ „ფრონტექსი" ევროკავშირს უკანონო მიგრაციისა და საზღვრისპირა დანაშაულის აღსაკვეთად საკმარისად არ ეხმარება.
„ევრონიუსის" ინფორმაციით, სააგენტოს დაეკისრება დამატებითი დავალებები. მაგალითად, მიგრანტების დეპორტაციაში უფრო მეტი როლის შესრულება, ასევე მომდევნო წლებში გათვალისწინებულია მისი ბიუჯეტის გაზრდა 440 მილიონი ევროთი.
2019 წელს ევროპულ სააგენტოს ახალი მანდატი მიენიჭა, რომელიც 2027 წლისთვის კორპუსის 10 000 ოფიცრამდე გაზრდას ითვალისწინებს, წლიური ბიუჯეტი კი, 900 მილიონი ევრო იქნება.
ევროკავშირის აუდიტორთა სასამართლოს მოხსენების მიხედვით, „ფრონტექსის" საქმიანობაში შემაშფოთებელი ხარვეზები იყო. აუდიტორებმა აღმოაჩინეს ხარვეზები და შეუსაბამობები „ფრონტექსსა" და ევროკავშირის ქვეყნებს შორის ინფორმაციის გაცვლის პროცესში, რაც ხელს უშლის მათ შესაძლებლობას, დააკვირდნენ გარე საზღვრებს.
