პარლამენტის ადამიანის უფლებათა დაცვის კომიტეტის თავმჯდომარის მიხეილ სარჯველაძის განცხადებით, პრეზიდენტის მიერ დასახელებული არგუმენტაციიდან გამომდინარე, ეჭვი ეპარება, რომ წარმოდგენილ ცესკო-ს თავმჯდომარეობის კანდიდატებს მხარდაჭერის პერსპექტივა ჰქონდეთ. მიხეილ სარჯველაძის თქმით, მოსალოდნელია, რომ წარმოდგენილ კანდიდატებს მხარდაჭერა არ ექნებათ და პროცედურით ახალი კონკურსი ჩატარდება.
რაც შეეხება ცესკო-ს თავმჯდომარის არჩევის წესის ცვლილებას, სარჯველაძის განმარტებით, ამ მიმართულებით მუშაობა არ მიმდინარეობს.
„პრეზიდენტის მიერ წარმოდგენილი არც ერთი კანდიდატი არ არის უკეთესი, ვიდრე გიორგი კალანდარიშვილი. პრეზიდენტის მხრიდან მისი კანდიდატურის არწარმოდგენა დაბრალდა პოლარიზების შემცირების სურვილს, წინა კენჭისყრაზე სათანადო ხმების მოუპოვლებლობას და ა.შ. ასეთი არგუმენტაციის პირობებში მეეჭვება, რომ ამ ორ კანდიდატს მხარდაჭერის რაიმე პერსპექტივა ჰქონდეს.
გაუგებარი კომპრომისისთვის უკეთესთან შედარებით უარესი კანდიდატურის წარმოდგენა არ გაამართლებს იმას, რომ ასეთ ლოგიკას დავყვეთ და ავირჩიოთ უარესი კანდიდატურა, ვიდრე უკეთესი. აქედან გამომდინარე, მოსალოდნელია, რომ წარმოდგენილ კანდიდატებს მხარდაჭერა არ ექნებათ და პროცედურით ახალი კონკურსი ჩატარდება. რაც შეეხება ცესკო-ს თავმჯდომარის არჩევის წესის ცვლილებას, ამ მიმართულებით მუშაობა არ მიმდინარეობს და არ მგონია, მომავალში იგეგმებოდეს“, – განუცხადა მიხეილ სარჯველაძემ საქართველოს პირველ არხს.
შეგახსენებთ, პრეზიდენტმა პარლამენტს ცესკო-ს თავმჯდომარის თანამდებობაზე ასარჩევად კანდიდატურები წარუდგინა. ცესკო-ს თავმჯდომარის თანამდებობაზე საქართველოს პარლამენტს ასარჩევად წარედგინა თამარ ალფაიძისა და რევაზ ეგაძის კანდიდატურები.
