დავით უსუფაშვილი აცხადებს, რომ პროკურორის არჩევის ის წესი, რომელიც ახლა „ქართულმა ოცნებამ“ წარადგინა, ჯერ კიდევ შარშან იყო ინიცირებული, თუმცა მაშინ მმართველმა გუნდმა ამ ცვლილებებს მხარი არ დაუჭირა.
როგორც დავით უსუფაშვილმა აღნიშნა, ვინაიდან ოპოზიცია დაინტერესებული იყო ამ საკითხის გატანით, მაშინ მოხდა დათანხმება და ეს პროექტი შარშან შემოდგომაზე პირველი მოსმენით იქნა მიღებული პროკურორთან დაკავშირებული აბზაცის გარეშე.
„მას შემდეგ, ჩვენი არაერთი მოთხოვნის მიუხედავად, ამ დარჩენილ ტექსტს კენჭი აღარ ეყარა მეორე მოსმენით. ეს საკითხი შარლ მიშელის შეთანხმების დროსაც დავსვით, შემდგომაც მუდმივად ვიმეორებდით. ზაფხულში გვქონდა მცდელობა რიგგარეშე სხდომის მოწვევის, სწორედ ამ პროექტის ბოლომდე მისაყვანად, მეორე-მესამე მოსმენით მისაღებად. პროექტის ბოლომდე მიყვანის ნაცვლად, ხელისუფლება ახლა გვთავაზობს ახალ საკონსტიტუციო ინიციატივას, რომელშიც სიტყვა სიტყვით, წერტილ-მძიმით, მათ შორის ერთი ზედმეტი წერტილითაც კი, ტექნიკური შეცდომით, გადმოტანილია ეს პუნქტი, რომელიც შარშან ამ დროს, საჯარო განხილვების დროს და მერე პარლამენტშიც მათი დაჟინებული მოთხოვნით იქნა უარყოფილი. ამბობდნენ, რომ ეს დააქცევს ქვეყანას.
ეს ტექსტი არის ის აბზაცი, რომელიც ჩვენ მიერაც იყო ინიცირებული და მზად ვიყავით, მეორე მოსმენით მხარი დაგვეჭირა. ცხადია, დღესაც მზად ვიქნებით, მხარი დავუჭიროთ ამ ტექსტს, მაგრამ თუ „ოცნება“ ცდილობს, პირველი მოსმენით მიღებული ტექსტი, რომელშიც არჩევნების შესახებაც წერია, გადააგდოს და ამის ნაცვლად თქვას, რომ ამასაც ხომ მხარს უჭერდით და მოდი, ჯერ ეს მივიღოთ და მერე ვნახოთ, რა იქნებაო, ცხადია, ამაში ჩვენ ვერ გავყვებით. მარტივი რამით დგინდება – პუნქტს, სადაც შედის ცვლილება, ახლა ჰქვია მე-11 პუნქტი და მე-11 პუნქტად კონსტიტუციაში პირველი პროექტით გათვალისწინებულია სწორედ პროპორციული არჩევნების საკითხები. ახლა ამბობენ, ეს წავშალოთ და ის ტექსტი ჩავწეროთო, რისი ისტორიაც მოგიყევით.
რა ჰქვია ამას? როგორ შეიძლება კონსტიტუციისადმი, პოლიტიკური პროცესებისადმი ასეთი დამოკიდებულება. დოკუმენტი, ერთად ინიცირებული და კენჭნაყარი, არის პოლარიზაციის შემცირების საშუალება, ამაზე ცოცხალი თავით მეორედ კენჭისყრას არ აპირებენ და შემოაქვთ ეს დოკუმენტი, რადგან 12 პუნქტშიც ჩაწერა ევროპამ. მანამდე შარლ მიშელის დოკუმენტში ეწერა, რომ ეს ცვლილება გასაკეთებელია.
სინამდვილეში ჩვენ ამას შარშანაც მხარს ვუჭერდით, კენჭისყრის დროსაც და „ოცნებამ“ თქვა უარი. ახლაც მხარს ვუჭერთ, მაგრამ ერთიანობაში, ერთად, რადგან ეს ცვლილებები ინიცირებული იყო გარკვეული ლოგიკით და თანმიმდევრობით. მხარს ვუჭერთ ამ ჩანაწერს, მაგრამ არა პირველი მოსმენით მიღებული კანონის სანაცვლოდ“, – განაცხადა უსუფაშვილმა.
