ოპოზიცია ამბობს, რომ სახალხო დამცველის არჩევის წესზე ცვლილებებს პოლიტიკურად არ უჭერენ მხარს და არა იმიტომ, რომ კანონთან დაკავშირებით კითხვები აქვთ, ეს არის აბსურდული, არაადეკვატური და არათანმიმდევრული ნაბიჯები მათი მხრიდან, – ამის შესახებ საპარლამენტო უმრავლესობის წევრმა, გიორგი კახიანმა განაცხადა.
როგორც გიორგი კახიანმა აღნიშნა, ოპოზიციამ კანონპროექტს პირველი მოსმენის დროს მხარი დაუჭირა, უფრო მეტიც, მეორე მოსმენის დროს კომიტეტზე მხარი დაუჭირეს, თუმცა ამის შემდეგ სახალხო დამცველის განცხადება იყო და ფაქტობრივად, ეს იყო მოწოდება ოპოზიციური ჯგუფების მიმართ, რომ მხარდაჭერა არ ჰქონოდა ამ კანონს.
„სახალხო დამცველის განცხადების შემდეგ ოპოზიციამ ცვლილებებს მხარი აღარ დაუჭირა. ალბათ, ეს არის ის მცდელობა, რომ ერთ-ერთი ვალდებულება, რომელიც ხელისუფლების მხრიდან სრულდება, ისე წარმოაჩინონ, თითქოს, ბოლომდე არ არის შესრულებული და უნდათ, გარკვეული ჩრდილი მიადგეს ამ პროცესს. ეს იქნება უსუსური მცდელობა, რადგან კანონპროექტი სრულიად გამართულია და ოპოზიციას კითხვებიც კი არ რჩება. ისინი ამბობენ, რომ ცვლილებებს მხარს პოლიტიკურად არ უჭერენ და არა იმიტომ, რომ კანონთან დაკავშირებით კითხვები აქვთ, ეს არის აბსურდული, არაადეკვატური და არათანმიმდევრული ნაბიჯები მათი მხრიდან“, – განაცხადა კახიანმა.
