მომეჩვენა, თუ ის ხალხი ლაპარაკობს აქ ვაქცინების დაგვიანებაზე, ვინც კბილები ამოუღეთ ხანდაზმულ ადამიანებს და მიატოვეთ მერე - თქვენი პროგრამა „ღიმილიანი საქართველო" გახსოვთ? - ასე ეხმიანება „ასტრაზენეკასთან" დაკავშირებით შეფერხებაზე ოპოზიციის კრიტიკას პარლამენტის ვიცე-სპიკერი არჩილ თალაკვაძე.
მისი თქმით, მათ ჰქონდათ ჯანდაცვის მინისტრთან კომუნიკაცია და იმ ადამიანებს, ვისაც პირველი ვაქცინის მიღებიდან 10-12 კვირის თავზე უწევდათ მეორე დოზის მიღება, პრობლემა არ შეექმნებათ.
„თქვენ აქ გინდათ ახლა მართლა დაგვაჯეროთ, რომ მართლა წუხხართ, რომ ვაქცინამ 2 დღით დაიგვიანა?
მინისტრთან გვაქვს პირდაპირი კომუნიკაცია და ეკატერინე ტიკარაძისგან გვაქვს ინფორმაცია, რომ ვისაც ახლა უწევთ 10-12 კვირის თავზე, პირველი აცრის შემდეგ უკვე მეორე ვაქცინაცია, ყველა მოქალაქე აიცრება, ყველას მიუვა სათანადო შეტყობინება და ეს პრობლემა მოგვარდება, ამოიწურება სრულად,"- განაცხადა თალაკვაძემ.
