პოზიციონირებთ, როგორც ყველას შემწე და მეოხე, თუმცა მინდა, გკითხოთ, რას ერჩით საქართველოს სამოციქულო ავტოკეფალურ მართლმადიდებელ ეკლესიას, – ამ კითხვით მიმართა დიასპორისა და კავკასიის საკითხთა კომიტეტის თავმჯდომარე ბექა ოდიშარიამ სახალხო დამცველს, ნინო ლომჯარიას, რომელიც დღეს პარლამენტში 2021 წლის ანგარიშს წარადგენს.
ამასთან, როგორც ბექა ოდიშარიამ აღნიშნა, თავის დროზე, ლომჯარიას ომბუდსმენად არჩევის პროცესები სკეპტიციზმით სავსე იყო და მმართველ გუნდს სურდა, დაეჯერებინა, რომ ის ყველას უფლებების დამცველი იქნებოდა.
„არაფერი პირადული – მხოლოდ საქმე. როდესაც თქვენ გირჩევდით წინა მოწვევის პარლამენტში, იცით თქვენ, რა სკეპტიციზმით სავსე იყო ეს პროცესი, თუმცა გვინდოდა, დაგვეჯერებინა და დავიჯერეთ კიდეც, რომ თქვენ ყველას უფლებების დამცველი იქნებოდით. ახლაც ასე პოზიციონირებთ, როგორც ყველას შემწე და მეოხე, თუმცა მინდა, გკითხოთ, მართლაც რას ერჩით საქართველოს სამოციქულო ავტოკეფალურ მართლმადიდებელ ეკლესიას. 29 სექტემბერს საქართველოს საკონსტიტუციო სასამართლოში გაიმართა განმწესრიგებელი სხდომა, საქართველოს სახალხო დამცველი საქართველოს პარლამენტის წინააღმდეგ, ბუნებრივია, აქ გვესმის, რომ ტრანსკრიფციაში იყო – ეკლესიის წინააღმდეგ.
აღნიშნულ სხდომაზე, რბილად რომ ვთქვათ, ძალიან უბადრუკად და უმწეოდ გამოიყურებოდა თქვენი წარმომადგენელი და ბოდიშების მოხდაც მოუწია. ეს კადრები ყველამ ვნახეთ. თქვენ აპროტესტებდით, რომ ტერიტორიების მიჩენის ნაცვლად, შესაძლებელია ახალი სტანდარტი დამკვიდრებულიყო, რომ ძველაშენებულ მონასტრებს, რომლებიც ამ კანონის მიღებამდე იყო აშენებული, მიეკუთვნოთ გარკვეული პერიოდით მოვლა-პატრონობით ტყის გარკვეული ფართობები.
გასაგებია თქვენი მოტივები, მაგრამ მაინტერებს, რამ გაიძულათ ასე სასწრაფო რეჟიმში, როდესაც წინა ზაფხულში შეიტანეთ ეს სარჩელი, მიუთითეთ, რომ არსებობდა დაზარალებული და ამხელა პერიოდის შემდეგ ზემოთ ხსენებული, თქვენთვის არასასიამოვნოდ გასახსენებელი განმწესრიგებელი სხდომისას თქვენს წარმომადგენელს პირდაპირ ცივი ოფლი ასხამდა და ბოდიშებს უხდიდა საკონსტიტუციო სასამართლოს მოსამართლეებს, რადგან ის იყო მოუმზადებელი. აღმოჩნდა, რომ ტყუილი იყო, რომ ვიღაც იყო ამ თემით დაზარალებული“, – განაცხადა ოდიშარიამ.
