მაროკომ პორტუგალია დაამარცხა და მსოფლიო ჩემპიონატის ნახევარფინალში ითამაშებს [ვიდეო] #1TVSPORT

მუნდიალებზე აფრიკული გუნდების მაქსიმუმი 1/4 ფინალი იყო. 1990 წელს ამ ეტაპზე კამერუნმა ითამაშა, 2002 წელს – სენეგალმა, ხოლო 2010-ში – განამ. მაროკომ მათი შედეგი გააუმჯობესა – პირველი აფრიკული გუნდია, რომელიც მსოფლიო ჩემპიონატის 1/2-ფინალში გავიდა.

მაროკოელებმა მიზნისკენ დიდი ნაბიჯი პორტუგალიასთან მატჩის 42-ე წუთზე გადადგეს, როდესაც საჯარიმოში ჩაწოდებულს ენ-ნესირი კარგად დახვდა – იმდენად მაღლა ახტა, თვით რონალდოც გააკვირვა და მაროკოელები 1:0 დააწინაურა.

ეს გახლდათ ენ-ნესირის მესამე გოლი მსოფლიო ჩემპიონატებზე. ამდენი გოლი მუნდიალებზე არც ერთ მაროკოელს არ გაუტანია.

მე-60 წუთიდან მატჩის სურათი შეიცვალა: თუ მანამდე მაროკოელები დაცვისას კარგად ამოდიოდნენ, მატჩის ბოლოს საკუთარ ნახევარზე გამაგრდნენ იმ იმედით, რომ ანგარიშს შეინარჩუნებდნენ.

პორტუგალიის ნაკრების მწვრთნელმა მოედანზე რონალდოც გამოიყვანა, ლეაოც, კანსელოც და პორტუგალიელთა შეტევები კიდევ უფრო მწვავე გახდა. ეს იყო კრიშტიანო რონალდოს 196-ე მატჩი პორტუგალიის ნაკრებში. იგი ყველა დროის რეკორდსმენ ქუვეითელ ბადერ ალ-მუტავას გაუთანაბრდა.

დიდი მონდომების მიუხედავად პორტუგალიელებმა თამაშის შემოტრიალება ვერ მოახერხეს. მაროკომ კი გააზრებული და თავგანწირული თამაშით თავი ბოლომდე დაიცვა. 1:0 აფრიკელთა სასარგებლოდ.

1/2-ფინალში მაროკო ინგლისი-საფრანგეთის მატჩში გამარჯვებულს შეხვდება.